اتراهن نا وياك عليها
تو اتغني كل سواقيها
اوتدمع بالفرح امواقيها
ونستغرب كيف درنة صبرت
ونقول سبحانه كيف عبرت
واجتازت كل مآسيها
تراهن نا وياك عليها .
.
اتراهن بكرة ايشرع بابه
الفرح وما تجيها الا صابه
وحتى اللي كثرو غيٌابه
يحضن أحزانه يواسيها
وعنا كل همومه ينفض
وركونه للواقع يرفض
ينهض امل
فروحه يومض
ويقول اللي فيها فيها
اتراهن نا وياك عليها
انا وياك عليها بكرة
تعاود كي ماكانت خضرة
يجود زهرها أيفوٌح عطره
وتضحك للفجر سوانيها
وحتى هللي اشتد حنينه
ألغيٌابه واكثر أنينه
له تهمس زهرة ياسمينة
عديها كي ما تعديها..
اتراهن نا وياك عليها
درنة هي للعز امباته
ما من صرح كبير رقاته
وياما من هول اجتازاته
اوردت كيد اللي ناويها
بكرة يالا البطحة غادي
نسمع رنة عود الشادي
حالم بابنية فالوادي
شايلة النسري فيديها ..
اتراهن نا وياك عليها
راهنني بيش مانت تبي
درنة م المحال اتهبي
بكرة أبعزة نفس أتصبي
واعزوم ضناها تبنيها
وحتى اللي حزنه ماطاق
أبصدره تو تلعب لشواق
لرضاها يقطع لافاق
وألها يأسف نين ايرضيها
ترا هن نا وياك عليها
