الجمعة, 14 مارس 2025
محكية

تقول أمي

من أعمال المصور الفوتوغرافي طه الجواشي
من أعمال المصور الفوتوغرافي طه الجواشي

تقول أمي وليدي اليوم متغير
رغم إني ما تغيرت ولا غيرت
حتى ف نظرة عيوني
حتى ف رمشة جفوفي
ولا ف صوتي
ولا حتى ف خطواتي

ورغم إني لبست قناع
انداري ف هم هالأوجاع
أمي دون ما نشكي
عرفت إني متكدر

شن بنقول يا أمي
متغير
ومتغير
ومتغير
م اللي صار في بلادي
شيء حزين
ويحّير

شيء كبير يا أمي
كان حكيت يحرقني
وكان سكتت يجلدني
حاير ما قدرت انقول
لا لكلام يسعفني
مش معقول
كل خطوة إيجيها غول
ينسفها وينسفني
هذا حالنا يمي
وهاذي بلادنا يمي
سنين وشادة المجهول

تقول أمي ما هي عادة وليدي
طول الوقت متوتر
هاللي قبل كان جناح
فيه الحزن ما يأثر
إن شاء الله بس مش عادة
سحابة صيف وتتبخر
شن بندير يا أمي
بدت عادة
بعد حكموا القوادة
بعد الألياش يأمي بدوا سادة
وكل واحد ف يده موس ويقشر

مقالات ذات علاقة

لحـظـة

أحمد جلنقة

حتى النوارس تجرح

الصيد الرقيعي

حــلـــم

سالم العالم

اترك تعليق