من أعمال التشكيلي عادل الفورتية
قصة

طنجرة الشربة

من أعمال التشكيلي عادل الفورتية

مررت على جارتي لأرى إن كانت تحتاج شيئا من السوق، اشتريه لها كالعادة قبل شهر رمضان، وفوجئنا بدخول ابنتها باكية وتصرخ.. (طلقوني منه معاش نبيه..!!!!) بعد تهدئتها كي نفهم منها ما حدث وقلوبنا ترتجف مما قد يكون سبباً لطلب الطلاق !!!

بدأت سنية تحكي لي ولوالدتها..

سنية: قلت لفرج (زوجها) واحنى نتغدوا يرفعني للسوق نشري حاجات رمضان، وكنت موتية قايمة بالحاجات اللي نبيها.. قراها وسكت وقعد يشبحلي … شوية.. وتقولوا قنبلة موقوته انفجرت !!!!

استغربنا الأمر وسألنا بصوت واحد: علاش ؟؟؟؟!!!

سنية: هما زوزقوايم.. القايمة الأولى فيها مواد غدائية، شوية لحم خروف طروف، وشوية لحم خروف للشربة، وشوية لحم بقري مفروم، وشوية لحم بقري شرايح، وشوية دجاج طروف، ودجاج مفروم، وشوية مكسرات للتطيب ومواد للحلويات وشوية معلبات وشوية حاجات هكي تعرفوا لزوم التطيب.!!!

مشي قالي “والله حرام وهذا تبذير وإسراف، هما بياكلوا الصغار أصلا؟ وأغلب الماكلة تتلوح …. فلوسنا ماشيات في الكناسة.. وهدا شهر الخير والبركة واللي نتعلموا فيه كيف نحسوا بالناس وبالجيعان و..

قاطعته: وبالك تحساب روحك بتعطيني درس في الدين.. اسمع أنت عارفني منحبش صغاري يشبحوا حاجة عند الناس وهما محرومين منها.. ومنبيش نكتر دوة أيوه.!!!

باهي حاضر أنا كلي ليك وللصغار واللي تبيه أنا فيه ….

وقلب الورقة وقريه القايمة التانية والشيطان اسم الله العضيم ركبه.. وبديه يصيح.. مواعين.. مواعين.. أنت متشبعيش مواعين..

ـبالشوية غير خيرك يافرج..؟؟ هما شوية مواعين.. صوينيات شربة..

مش شرينا العام اللي فات صواني شربة ؟؟

اتكسروا نفصهم.. الله غالب..

باهي والصفاي..؟؟

نبي واحد جديد اللي طرفين زي جارتي فيه تحته صونية تستقطر فيها الميه.. شنو فيها ؟؟ اللطف على صفاي ؟؟!

فرج يصيح بعلو حسه ــ طنجرة للشربة ؟؟ متقوليليش انكسرت حتى هيا.. مش شرينا العام اللي فات.. واللي قبله.. واللي قبله.. متقوليليش شنو حكايتك مع طنجرة الشربة.. ؟

مهو الشربة هيا الطبق الرئيسي في فطور رمضان وأنا نحب نديرلها طنجرة خاصة بيها.

يعني الشربة لازم كل عام طنجرة جديدة؟ باهي علاش ما ادسيش طنجرة الشربة من رمضان لرمضان ؟؟ ولا على خاطر مش تاعبة في الفلوس ؟؟ وتعالي هنا، يعني كان طيبتي الشربة بطنجرة قديمة بيتغيير طعمها ؟؟! هيا والله ما ني شاريها …

سنية حطت ايديها في جنابها ـــ هيا منيش قاعدة معاك من غير طنجرة جديدة ولما تشريها تعال ارفعني من حوش بوي.

فرج يصيح ــ يمين بالله ما أني شاريها وبري لحوش بوك على كيفك لكن.. متلوليش دراعي بطنجرة شربة.

خلاص أماله.. أنا في حوش أماليه وأبعتلي ورقتي.

بعد يومين من الحادثة عادت سنية لبيت زوجها فرج رفقة أبيها، حاملة طنجرة شربة اشتراها لها والدها في طريق العودة إلى بيتها..

لعنوا الشيطان جميعاً.. ودخلت سنية للمطبخ وأعدت القهوة لأبيها وفرج..

مقالات ذات علاقة

التراب الوطني

أحمد يوسف عقيلة

جيتارة المدينة

المشرف العام

أميرة فارسية

المشرف العام

اترك تعليق