عنك ما نتوبوا

رأفت بالخير

عنك ما نتوبوا فبراير.. مهما قالوا صار وصاير
علاش نتوبوا ما كفرناش
قلنا الحق وما خفناش
لطاغي في حكمه طاش
داير في بلاده القهاير
*
عنك ما نتوبوا فبراير.. مهما قالوا صار وصاير
ليش نتوبوا من ثورتنا
يوم اللي قلنا كلمتنا
عدل وحرية غايتنا
رصاص يصادي جانا طاير
*
عنك ما نتوبوا فبراير.. مهما قالوا صار وصاير
علاش اليوم قعدتوا تلوموا
درنا ثورة الخير نروموا
فيها شباب الموت يسوموا
ردوه الشر على الغاير
*
عنك ما نتوبوا فبراير.. مهما قالوا صار وصاير
شن ذنب الثورة سرقوها
شلتت ومجارم هانوها
بعون الله لينا نردوها
وترجع منصورة يا ثاير
*
عنك ما نتوبوا فبراير.. مهما قالوا صار وصاير
عنك يا ثورة ما نحيدوا
لا سرقنا لا شر نريدوا
حلمنا بوطن شبابه يزيدوا
ويفرح يتهنى اللي حاير
عنك ما نتوبوا فبراير.. مهما قالوا صار وصاير