عندي قلب ماكن فيه داء
داه مرض ما منه شفاء
وعندي قلب
عايش باليباري
مريض انجض ونا زامط انواري
غير انموج ونجازي بناري
فيا اجروح تنزف في خفاء
جفاني النوم دمع العين جاري
طول الليل ما نبطل ابكاء
اتشيل اتجيب وتقدع افكاري
تجيب اطياف خويا والضناء
خذاهم قدر طفاهن انواري
اسناحي طاح عرم عالوطاء
ما في حد باللي في داري
يحس النار من فيها وطاء
يدس العقل وكاتمهن اسراري
كيف الجمر تلهب في الحشاء
حصدت الشوك ونا زارع ازهاري
سقوني السم ونا ساقي الدواء
ظلم الناس لخبطلي اعياري
قراب الدم واصحاب الغلاء
ياس عنيد جا مقابل اصداري
ما هاودش ولا مره اختفاء
علي مكتوب يبقى دوم جاري
يتبع في ما عمره بطاء
بقو عناد كسرلي الساري
كسر مجدافي قطعلي الرشاء
ابقيت انجول ذاهب عن مساري
ظلام اوليل وغاب نجم السماء
في ديموم وارى عن انظاري
منار المرسى والضي انطفاء
دعيت الله اللي عالم اخباري
اللي ما فيه مقطوع الرجاء
الطف بي يا ربي الباري
بجاه نبيك اللي إقراء قراء
يا مولاي بدلهن اقداري
عزمي خار وطال بي الشقاء
البريقـــــه
يوم الثلاثاء الساعة 4:30 صباحاً
الموافق 2021/10/27
