تعال هنا
واثقب جدار الانا
اهتك اسرار النجوى
واطلع خلاص م العنعنة
ما سر يخفي سر
اكشف غموض النشوى
واسكر بعطر السوسنة
مازال مشوار الهوى في اوله
يادوب في ثامن سنة
اسمك وعطرك المطر
مايحجبن صوت الحنين
مادام ماغنت الروح لروحها
ومادام صوت الناي
هو اصل الغنا
دندن بلحنك
واكسر ايقاع الحزن
يحلى الغرام .. ب الدندنة
تعال هنا
يكفينا معانينا .. خفا ع الترجمة
ويكفينا اغانينا .. بكا ع الملحمة
الحب شعر الروح
والروح اصل المعضلة
انت بلا انت موش انت
وانا موش انا
تعال هنا
تعال هنا
في بيناتنا موعد وهمسه
غنوتين ولمسة
وكتاب الضحك والنسيان
نقرواه في ضي القمر
ونخربشوا علي وجهه (كونديرا)
ضحكتين ورسمة
شن همنا
هل وقت وقت الخوف او وقت الفرح
تعال نمسحوا من قاموسنا كلمة جرح
ونتوسدوا الشاطي
وتقوللي محلاك .. ونقولك ياسمح
وقبلة علي قبلة
متشابكين عالرمل
نين يطلع علينا الصبح
كل الاغاني المستحيلة في البلد
بالحب تقعد ممكنة
مايكذبوش عليكم
مازلت قاعد هنا
بس انت تعال
___________________
بدأت في الاسكندرية 14/12/2012
انتهت في بنغازي 19 /10 /2018
