نصوص شعبية لشاعر الوطن
أحمد رفيق المهدوي
تنشر لأول مرة
عن مجلة (تراث الشعب)_ العدد:1_ مسلسل:51_ السنة:24_2004
نساهي العـقل*
نساهي العقل يخونّي ويجيبه
يخطر يجي وانِ المنام سريبه
الوطن الغالي
له خاطري عطّل عليَّ اشغالي
سريبه نهار وليل يتهايا لي
يجي بين عقلي والمنام وطيبه
ولابا يميل لغيره
ولا خير ف الدنيا يساوي خيره
يا ناس خلاَّ خاطري في حيره
نلاجي كما الملسوع غاب طبيبه
حتى ونا متواري
غريب دار ديما دايخات افكاري
جرى حكم ربي والمقدّر جاري
عليَّ بالياس والتغريبة
* أداها الفنان “علي الشاعلية”، المتوفي: 09/02/1973، كأغنية.
****
تبقَّى على خـير
تبقى على خير يا وطنّا بالسلامة
ورانا ندامه
ويا عون من فيك كمّل ايامه
يا عون من كمّل اوقاته
ومضّى حياته
في عز لا قهر لاصغا لاشماته
حتى مع الفقر والقل والشحاته
تطيب المقامه
لولا العدو فيك ناصب علامه
لولا العدو اللي فيك حاكم
وداير محاكم
بالشنق والنفي فينا يحاكم
سوا حال مظلوم منّا وظالم
قليل السلامة
بلا بينه من يجي ف الدهامه.
****
دعـا شـر*
دعا شر بيّا جيتي لبنغازي
الناس راقده ونانبات نزازي
نبات بطولي
بهمْ ما فارق دقيقة زوالي
سلكي تخبّل قبل نطوي نولي
نبي نخلصه مازلت فيه نعازي
نبات ندور
طبيبن يداوي داي ها اللي جوّر
سكن في جوفي نين دمي فوّر
تفوير المويه فوق نار القازي.
* هذه الأبيات نظمها “رفيق” عند عودته من هجرته الأولى في تركيا وإقامته في بنغازي مدة عامين (1934-1936)، ويرى انه قالها عندما ضاق بأساليب (بصاصاة) الطليان في المدينة، تلك الفترة.
****
يــا صـاحبي
يا صاحبي نا كبدتي مليوعه
العينات سلوى وقامته مردوعه
قامته طوالي
ما نشهره وما نقول غير غزالي
من يومن عشقته ما عجبني والي
الناس كلها في حافره مجموعه
الناس كلها في صيبه
وهوْ رجح بالكل فاز نصيبه
اللي حجره عني عطيه مصيبه
تخليه يشحت كبدته مليوعه
****
غـزال الريــم
غزال الريلي كنّه مواطي عينه
وقارن حجاجه ما يبهْت فينا
مواطي راسه
خايف من نّقار والبصاصه
اللي حجّره مولاي عطيه رصاصه
تجيه ماكنه بالقيس فوق جبينه
كنّك نافر
انت مسلم وعندك دين ولا كافر
نا ياغزال الريم بكره مسافر*
نخليك لنَّــقار بينك بينه
* نظمها “رفيق” قبيل سفره إلى تركيا، في هجرته الثانية سنة 1936.
****
خـذوا العـقـل
خذوا العقل خلّوني ندوح وراهم
اعزاز ما نطيق نعيش بلاهم
نارهو ولاَّعه
اعزاز ما نطيق نغيب عنهم ساعه
خذوا العقل خلّوا خاطري باوجاعه
يخمم على مقعد جديد معاهم
نارهم كوّايه
وين ما نروق تشيط فوق معايا
نجي مستفيث نريدهم طفـّايه
يزيدوا حطب ع النار من يالاهم
