الوزارة الجديدة

غسان سلامة: إن مدى النهب الحاصل في ليبيا، لا يمكن تقديره، ولا يمكن تقدير مدى عملية الفساد وسرقة الأموال العامة.

أغلق صابر جهاز التلفزيون بعصبية بالغة وهو يضرب كفيه بعنف مرددا: لا حول ولا قوة إلا بالله.. حسبنا الله ونعم الوكيل حسبنا الله ونعم الوكيل.

هرعت صبرية إلي زوجها مهرولة وهي تردد: خير.. ان شاء الله خير.. شن صاير يا صابر.

– شن بيصير أكثر مما صاير يا صبرية.. أولاد الحرام – اللي ناسيين ربهم ودينهم وأهلهم وناسهم اللي باعوا أخرتهم بدنياهم – سرقونا هلكونا جوعونا مرضونا مرمطونا.. قتلونا وإحني حيين، الفساد والنهب فات حده ملايين ومليارات مسحوهن مسح، واللي يوقف في طريقهم ما يلقي كان الخطف والتهديد وحتي الموت لو كان ما قدروش عليه.

-لاحول ولا قوة الا بالله.. حسبنا الله ونعم الوكيل فيهم، وكل من ضيع البلاد.. و يبيلنا الشر والفقر.

جلست صبرية بجوار جوزها ونظرت في عينيه مباشرة.. شرعت معه في حوار هادئ لمناقشة هذه المشكلة العويصة التي تمس كل مواطن ليبي.

– قولي يا صابر، مش عندنا جهات ومؤسسات حكومية تكافح الفوضي والفساد هذا اللي صاير في البلاد.. وزارة الداخلية، وزارة العدل، جهاز الرقابة الادارية، ديوان المحاسبة، هيئة مكافحة الفساد، وغيرهم وغيرهم تعد وتغلط

– خليك معاي شوي – أخذ صابر بيدي زوجته ونظر إلي عينيها موجها كلامه بهدوء – عمرك يا صبرية سمعتي في أي محطة تلفزيونية او جريدة او حتي في صفحات النت عن واحد من الفاسدين سموه بالاسم حرفيا ووقف قدام القضاء وحكمت عليه المحكمة وحبسوه والا غرموه والا حتي أعدموه، اللي نسمعوا فيه كله عن تقرير ديوان المحاسبة.. تجاوزات وخروقات هني وغادي.. وخلاص.. شن صار بعدها.. مافي شئ

طأطأت صبرية برأسها موافقة علي حديث جوزها الذي كان فيها كثيرا من الصواب.. واردفت قائلة:

– أني عندي راي..

 صمتت صبرية لبرهة ثم استرسلت في حديثها بشيء من الثقة

– هذا اللي يقولوا عليه بره من الباكو وإلا مش عارفة شنو..

أشارت بإصبعها إلي زوجها في حركة نفي للتحذير والوعيد

– لكن رد بالك تضحك وإلا تسهوك علي.. خليني نقول رايي واسمعني للأخر.

-ضحك صابرلبرهة ثم قال: قصدك (فكرة خارج الصندوق).. خلي نسمعوا هاتي الراي.. شن ورانا حني.. نهدرزوا ونقصروا الوقت.

وضع صابر يده تحت ذقنه وأرهف السمع بحرص شديد.

– إحنا قديش عندنا وزارة في الدولة وقديش الميزانية السنوية اللي تعتمد فيها الحكومة.

– تقريبا 32 وزارة.. وميزانية الدولة من بين 40 و50 مليار

– بسم الله ما شاء الله يعني ميزانية أربع وإلا خمس دول إحنا نحوسوا فيهم في سنة وحدة.. هذا اول سبب من أسباب الفساد.. خلينا منه.

إحنا مش عندنا 32 وزارة..  نزيدوهم وزارة جديدة يولوا 33 وزارة وبنفس الميزانية العامة للدولة، خلي نسموها (وزارة الدولة لشئون الفساد والمفسدين) وإلا أي إسم تاني يختاروه معانا السامعين..  نلموا كل من هو فاسد ومرتشي ونصاب وخانب من كل وزارات الدولة، ونخدموهم في هالوزارة الجديدة.. ونطلقوهم يشوفوا شغلهم ويبدعوا في النصب والاحتيال والسرقة.. خلهم يحوسوا فيها..  بأوراق رسمية وشعار وتحت عيونا.. نخصصوا لها مبلغ من الميزانية – هو الخير هلبة ساد وباد و الفلوس رايحات رايحات ع الاقل يكون الرقم عندنا مرصود وثابت وحجم الفساد واضح وجلي – وايضا..

أسمعني زين –  رفعت صبرية إصبعها عاليا مشيرة لجوزها للتأكيد ولفت الإنتباه – ركز معاي ع النقطة هادي يا صابر:

كل وزرات الدولة تنظف.. – دير تحتها خطين –  تنظف من هالشلل الفاسدة وتشوف شغلها بالتمام والكمال.. الإسكان يبنوا شقق للشباب.. والمواصلات تبني طرق وجسور ومطارات.. والتعليم يعلمونا أولادنا ونشوفوا مستقبل حلو لأطفالنا..  والصحة تهتم بالمستشفيات والمراكز الصحية تلقي من يستقبلك ويداويك ويعطيك الدواء وتشفي وتبرا بإذن الله.. وغيرهم وغيرهم.

أنهت صبرية توضيح فكرتها بكل تفصيل ممكن، ونظرت إلي عيني زوجها تستفهم أثر حديثها في نفسه وهي تردد:

آه شن رايك في هالفكرة اللي برة من الباكو.

-والله يا صبرية حتي هوا راي.. ما دام الفكرة هاذي فكرتك وإني نشوفك متحمسة ليها هلبة.. شن رايك نرشحوك تمسكي الوزارة هادي وتسيطري علي الأمور وكل حاجة تمشي علي شبح عينك.

– نظرت صبرية إلي زوجها نظرة شك وريبة وقالت:

نحس فيك تسهوك زي عوايدك.. إنت عارف من حط الشيطان في شيشة وسكر عليه… تعرف وإلا.. لا.