محكية

سِرّ النُّوا (هون)

هون القديمة
هون القديمة

يا عطر الصحاري..
يا عبق وشذا..
يسالو : ..
عنّك الرايح ، واللّي جاي..
وحتى انا..
كيف جَيْتي ..؟
ومن غرسها فـ هالخلاء..؟
زعم نَزَّلاتك قافله ..؟
ولا أنتي تايه وْ زَادَه تَمْرَه ..؟
وأنتي هي أول نوا ..
حضنتي الثراء متعطشة لميلادك ..
وسط الفيافي المقفره ..
وكل قِرْبَه عابرة تسقيك ..
لين ما بقيتي شامخة ..
وظِلّك بَرَمْ ياما بَرَْم ..
وكل يوم يولد يوم ..
لين ما العراجين كِبْرَنْ ..
والغَمَقْ وَلاّ بِلَحَ ..
آه يا محلا حلاه ..
والصفار ينتشر فيك انتشار ..
يا عروس مزينه ..
وفستانها لون الخضار ..
يوم عرسك ..
يوم لفُوك العابرين ..
والزاد منك اول حبَّات الرَّطَبْ ..
مِتْفَرَّشّه بِرْمْال..
السّحر فيها كيف اكتمال القمر ..
يْعَنّي بقيتي ناضجه ..
والزاد للزَّوادة ..
واللّي كلا تَمْرك ..
يزرع نواك يا باسَقَة فـْظِلّك ..
وتكبر حداك السانيه ..
وتبدا حكايه ثانية ..
يا الأُمْ يا سِرّ ، وْبَهَاء ..
فيك المآذن طالعة ..
تْحاذي هامات النخيل ..
وعَذْب السُّواقي ..
متلاعبه بضي الشمس ..
والعصافيراتَّغازل في سماك ..
والناس تَمَّتْ لافيه ..
معا كل طلعت شمس ..
ومعا غْرُوبها ..
سَجَّادهم ترابك الطاهر ..
هاللّي غامرهم مَحَنَّه ..
وفْـ حضنه حَسُّوا بالدفاء ..
يا عشق تَمَّا يرتسم ..
بالطّين بجذوع النخل ..
بالزَّرب متغطي..
وفي طرافها ملاحم ذِكْر ..
بِنْدِيرها يصدح ..
وأنفاسها جاوي ..
والروس تتمايل ..
تْوَحِّد قوي واحد ..
ريت سِرّها اول نُوا..
اللّي سكن بدري احتار ..
في عشقها ، وختارها ..
عِزّ المنازل ، والديار ..
ومَنْ زارها مرة ..
مِنْ حيرته يحكي ..
عَن حُب ، وأسبابه نُو ا..
يا واحتي يا هون ..
ف القلب ديمه ساكنه ..

مقالات ذات علاقة

محكيات

الصيد الرقيعي

سلامٌ على بلادي

المشرف العام

اصْـروع الريْـحَ

بدرية الأشهب

اترك تعليق