– السلام عليكم
– نعم وعليكم السلام . . أهلا ياخوي تفضل
– حضرتكم شركة المياه والصرف الصحي وإلا لا . .
– نعم تفضل ياخوي
– نتصل بيكم نبي نقدم بلاغ عن غرفة تفتيش صرف صحي في شارعنا . . ليها يومين فايضة. الشارع تقول وادي . . الميه السوداء تدلف من الصبح لليل . . والصنة الفايحة ما نحكيلكش تشمها من كيلوا ميترو
– كويس . . وإحنا شن تبينا نديرولك ياخوي . . إنت عارف البير وغطاه . . انت عايش في ليبيا وإلا وين عايش
-ايه عايش في ليبيا . . لكن الحالة هاذي مستعجلة وما يمكنش تأجيلها وإلا تأخيرها
-إحنا آسفين يا خوي ما نقدرو نديرولك شئ . . شوف عمك الهادي . .
– ؟ ؟ ؟
– وإلا نقولك حتي عمك الهادي ما يقدر يديرلك شئ . . الأمور كلها توا واقفة مجمدة . . قاعدين نراجو في التطورات السياسية وشن بيصير بعد الحوار والمناقشات والإجتماعات والندوات والمؤتمرات
– توا شن دخل السياسة في المجاري والصرف الصحي
– كيف ما هي حتي هي فرع من فروع المجاري والمسالك في الحياة
قولي . . توا لما تتفرج عليها في التلفزيون . . ما تشمش في الصنة العافنة يا خوي
-!!!!!!!!!!!!!!!!!!!! ؟؟؟؟؟؟؟؟؟؟؟؟؟؟؟؟ !!!!!!!!!!!!!!!!!!!
