حميد الذيب
اتصدقوا…؟
رغم الغياب
وليل طول ما كمل
وآهات وسمور عذاب
وعقل يدوي ما ايمل
في بين بينه في خفاء
يرحل يجيب ايلم
يحكي حكايه يسرد علل
وهدب وين ينشف ايجف
ايترع الدمع ايجم
به المواقي تمتلى يحرق العين
ينزل حذايف يجرح الخد
يروي اطراف الكم
اتصدقوا….؟
مع أطياف تسكن في العيون
وين ما الظلام ايحوش
وعتمة الليل اتعم
اداعب حنايا الخاطر
ويرحل النبض ايسافر شوق وحنين الهم
وقلب خفقاته حسايف
وجرح جوا جرح وين اندمل
ناضن اجراح اخرات
سطر سطير الجرح
نطف نزف ترع الدم
اتصدقوا …؟
و نا ومركبي هلي دليله راح
وجون تباعد في الغريق توارا
ودر مساره تاه في بحور السراب
ومجدافه تكسر وساريه ممزوق الشراع
ضاعن دروبه وضي المناره غاب
والربان حاير في المسافه
ونجم الدليل توارى وحتى الثريا ضاع
اتصدقوا …؟
ما زالت نعرف نخبر
ومازالت نقدر عالمصاعب نصبر
لوحة الساري نجبر
ننشر شراعي
وللمواني نعبر
أتصدقوا….؟
مازال عندي أمل
ومازالت قاعد حي
اتصدقوا…؟
برغم الشقاء
وبرغم الجفاء
برغم العناء والموح
وكسرة الخاطر في خفاء
وذبلت ورود الروح
برغم الأنين
برغم البكاء والنوح
مازال عندي أمل
ما زالت نا الخل الوفي
ومازالت قاعد حي.
اتصدقوا….؟
مازال نبعي صافي
ومازالت كي لول الحضن الدافي
ومازال حوضي بالحنان اذرافي
ومازلت قاعد حي
ومازالت نا الود النقي
ومازال عهدي وافي
وما زالت نا الخل الوفي
وما زالت………
.
اتصدقوا…؟
مازالت راني حي
.
البريقه
الساعه 01:30
صباح يوم الثلاثاء الموافق 2017/10/03
