يسرح خيالي مع وجوة النساء..
وكل يوم يشبح جديد، مراه من نقيات الذهب،
ومرات راكبهن صداء
كلامي عنيت بيه..حشوميات من بيت عشريني
بنات لجواد، بنات العرب
الي صخابهن كان شميت.. مخدومة عجب،
وعطرهن كان فاح تخطر بلاد العجم
وعيونهن كان ريت.. عيون راتعة في قرارة
حطابات من وادي بعيد.. حلابات لشول قبل ضحاه
شيالات على الراس جرة.. وعلى الكتوف قرب
انكان الكبير ندة يلقاهن حداة..
وانكان الصغير صرخ.. ازازن بيه ويشيلن عناه
نيرانهن مع الفجر تكبر..
ما ينزح قدحهن ولا ايواطي، لعند وان المباتي
حديثهن دوم محشوم موزون وزن القوافي..
من يسمعة بهن مذهول.. كلامهن
اخش خاطرك ويداوية.. كلامهن
حنونيات هن، عطوفيات هن، حمالات صبارات هن،
جيابات ربايات للولدان هن
دور عليهن انكان لقيتهن..
دور…قليلات في الدنيا انضن ..
وضني الوقت موش لهن
وياريت ضني ايخيب ويرجعن.. بنات العرب لجواد،
هلي العفه في وجهن، والعقل جوهر من ذهب
خليك من الزدن في الدنيا واجدات..
انكان حدثن ما تطرب لهن..
وانكان واجبن كيف الخناجر يطعنن..
حط وجاب قات وقال.. دبوبيات ما يركحن،
نقالات جيابات للكلام البايت
نفخ النار من تحت الرماد صنعاتهن..
خلاطات انجوع، خراب لبيوت عاداتهن
يوم السعادة عندهن.. يوم يسمعن.. بيتاً اشاضة وانكسر
تذمن على قلت النوم في رفقتهن..
كثر الكلام لهن ، والترترة شغلتهن
اعمل حسابك للرجيم.. من يوم الخميس..
ايوه من ليلة الجمعة
تحسبها فلاحة مونت اسبوع، خيرات من كل نوع..
تحطها في صفرة وتقولك مجماج
هذي لوله او شد ماجاك..
مقيوله الشاه الي ما تقودها من قدام ما تبعك
ترفع اللقمه لولى وتقول بسم الله.. وقبل تنزل جوفك..
هي ناصبه وتبدة بقولت قول
بجرنان موش وقتة.. اوشي موش معقول
وتنسد نيتك وتحمد الله.. وهاذيك تبدى عادتك
