ماني صافي
نجازي بجرحي وحيرتي وريافي
لو تعلمو بالحال
نجازي بروحي
تحت الظميده ماكنات اجروحي
زامط وكاتم في الجواجي بوحي
افراشي الوجع والدمع تما الحافي
نجازي بهمي
مكسور منقند مجروح ينزف دمي
نمسح دموعي في حواشي كمي
ملاني الوجع واصل جميع اطرافي
نجازي حاير
مليت من صغاء ليام واللي صاير
لا القيت حيله ولا القيت دباير
شايل احمول اثقال فوق اكتافي
غير انجول
وجعني ولد وطني اللي مذلول
في الخرده ايلقط ويبع وفي القعمول
اشقو بوطنكم يا هو بالك كافي
يا ما شايل
اهمومي مع هم الزمن المايل
نكذب علي روحي وغير انحايل
صيوري تلاف منهم اسباب تلافي
غير اتهيل
تذرف عيوني في الدموع اتسيل
لا ليل نرقد لا نهار انقيل
كيف السليم زامط السم ازعافي
ضني خاب
خاب في حبيب الروح يا الاصحاب
ونا اللي سقيته من الحنان اكواب
وهو اللي طعني غدر بين اكتافي
غير انذوح
ولا قدرت نسكت ولا اقدرت انبوح
مقدر جراء مكتوبلي في اللوح
مالت الدنياء وكسرت مجدافي
سامر كابي
بيت القصيد طول وطال عذابي
فاقد ضناي اللي عليهم عابي
زيته كمل اهو فناري طافي
البريقه- ليبيا
يوم الأثنين الموافق 11/07/2022
