محكية

الأميرة ..

من أعمال التشكيلية الليبية نجلاء الفيتوري.
من أعمال التشكيلية الليبية نجلاء الفيتوري.

 
مَنْ الأميرة في النساء
اللّي تسكنك ؟
ومَنْ الملاك ؟
 
ولمَنْ هالقَصْر العَتيق المَخْمَلي ..
ومُش مَخْمَلي لولاك ؟
 
والشِّعر ــ ياسِتْ الشِّعر
ــ ما أسْعَدَه – ..
يا يحترق في خاطرك ..
يا يصطفق من سحر فاك .
 
مَنْ بَكَّى هالعيون ؟
مَنْ خَلْخَلِك ؟
مَنْ ـ عاد ـ جَلْجَلْ ضحكتك ..
لين أمْطَرتْ .. بَرَد ،
وْ وَرِد ، وأنغام ..
مفتونه هواك ؟
******
مَنْ الأميرة في النساء ..
مش قصة إنَّا نجهلك .
أو إيش اسماك .. أو مَن هَلِكْ .
أو كيف حُسْنك في رضاك ..
أو كيف جَمالك في ازْعَلِك .
 
إنتي فكرة .. لو اصطدناها مساء ..
اتْبَدّل صُبح بُكرى .
 
إنتي ذِكرى .. للّي ما زال ما نِشَأ ..
في بالنا ، ولا صار ذِكره .
 
إنتي مَيْس موج البحر ..
وبعض صَحوه ، وبعض سُكره .
 
ودانته ، وْ وَدَعَه ، ومحَّاره ..
وحَمِد بحَّاره ، وشُكره .
 
ودمعه ، وسيرة عَطَبْ ،
ومُرْ غُرْبه ، وْعُمْر طَوْف .
 
وارتباك الوان لما .
تشطحي برّا الشوف .
 
ضفتين أنتي ، ومرسى ..
و روح مجذوبه بصوف .
 
لمّا جيتي .. الهوا ..
أصبح ولوف .
 
والعطر .. قبلك ، وبعدك ..
يحرسك بين الصفوف .
 
والدَرَجْ .. رَقْ لْنَعَالِك ..
والفَرِش لَحْمَر .. يوشوش :
يا قَدَمْها ما تْروف .
 
والثُّريات اتّغَنّجْ ..
ضاجّه بألون طيف .
 
والسّتاير هَفْهَفُوا ..
وما دَروش الناس كيف .
 
والشّبابيك اتّضَاحَك :
نَجِمْنا .. يا ليل شُوف .
 
والحضور اتْزَاحَموا ..
وْقُوف ، وْكُفوف .
 
ـ هللّي هَلّلْ : مرحبا بِكْ .
ـ واللّي مَدّ إيده يْسلّم .
ـ واللّي غَنَّا .. أووف . أوف .
 
ـ واللّي ساهم ما تكلّم ..
شاغله سِحْر الوُصُوف .
 
ـ واللّي فاز بْنظره مِنّك ..
مَيّزاته عالضيوف .
 
ـ واللّي يهمس : مَغْرِبيّه .
ـ واللّي أُسْكُتْ : مَشْرِقيّه .
ـ لا .. تُهَامه .
ـ لا .. اليمامه .
ـ مِنْ .. شِآم الشام لَخْضَر .
ـ آشوريّه . إبْعلبكيه . برقاويّه .
صفاقصيه .. عنّابيه .. ادهلقية.
جفْراويه .كلهم أنتي اختصارهم ..
وطوفي . طوفي .. يا طيوف ..
 
أيه يا عيون المَهايَه ..
يا رِماح ، ويا سُيوف .
 
ذكّرينا بالبراري ، والصحاري .
وهيبة ، وسِرّ الكهوف .
 
والنَّخَل ـ بلحة ، وشُوكَه
ـ يا جَنَى داني القُطُوف .
 
انتي خليتي المعاني ..
في تساؤل كيف . كيف .
 
كيف أنّـثْتي سماء المحتفين .؟
كيف بَطِّيتي الثواني ..
دَقَّه دَقَّه في كسوف ؟
 
كيف حَنَّنْتي المُوسيقى ؟
كيف شكَّنْتي الحروف ؟
 
حتى هالكرسي المُطَرَّز ..
لمّا هَمّيتي ، وجلستي ..
إضْطَجَعْلك .
 
حتى كُوب الشاي .. لِمَعْلِك .
 
وسَكَتْ مِهْباش هَيْلِكْ ..
وين حكيتي ..
الله . الله .. يِسْتِمَعْلِك .
 
والعيون بْهمس .. قالت :
هالحَلا كيف اجْتِمَعْلِك ؟
 
واتْسَعْلِك .. قلب عاشق ..
يا ترى كيف اتْسَعْلِك ؟
 
أعتقد .. كُل شئ شافك ..
شَال قُبَعْتَه وركَعْلِك .

مقالات ذات علاقة

درويش تحت الريح

الصيد الرقيعي

معاك وفي

أحمد جلنقة

همزة وصل

محمد الدنقلي

اترك تعليق