حميد الذيب
وين ما عليا تبعدي يفيض الحنين
ويهوج بي الشوق
وترحل الروح وراك
اتريد الحنانه منك
وين ما علي اتغيبي انحس المكان غريب
ويطول عليا الليل
وحتى القمر والنجم
تنشد معايا عنك
نلقى العقل امرايف
والقلب حاله صايف
راحل وراك النبض
وحتى افكاري ايجنك
ياحضن الحنان الدافي
يا ود كيله وافي
يا بلسم دواء لروح
يا منهل شرابه الصافي
انكان مش انتِ من؟
ايظمد نزيف الجرح
انكان مش انتِ من؟
اسباب الزهاء والفرح
انكان مش انتِ من؟
يجبر صميم الخاطر
ويمسح ادموع العين
وينشد ايقولي كنك
انتِ الحنان الظاهر
انتِ العسل في قيره
وانتِ الجمال الباهر
يا سمحة التصويره
انتِ الوفاء وانتِ السماء
انت المطر انتِ العطاء
انت الملاك الطاهر
ياعاطره في السيره
كل النساء في الكون
فى شي ما يسونك
يا امل عمري يا مرابع عيني
ياحلم وردي يا ربيع اسنيني
يا طيف ديمه فى منامى ايجيني
انرايف عليك وانت احذاي
نشتاقلك وانت امعاي
انتِ حلاوة دنيتي
وانتِ زهاي وفرحتي
نبقى حبيبك ديمه
وما ايخيب فيا ضنك
انتِ كل شى
