مازال بدري يا ظروفك.. يا سود العيون
مازلنا قاعدين
ومازال ما طاب الهوى بيناتنا.. ولا راق الحنين
ومازال ف الخاطر كلام نقوله
ويمكن السهرة تطول.. وتاخذ الليل بطوله
وممكن تطول سنين
مازال بدري يا عيوني.. خلينا قاعدين
مازال ف الليلة قمر.. ما مل من همساتك
ومازال ف الجلسة بحر.. يدوي مع حكاياتك
ومازال حاضنّا شجر.. يفرح مع لمساتك
ومازال في يدي وتر.. يطرب مع آهاتك
ومازال ف الخاطر كلام نقوله
ويمكن السهرة تطول.. وتاخذ الليل بطوله
وممكن تطول سنين
مازال بدري يا عيوني.. خلينا قاعدين
ما زال ما طاب الهوى.. يا حلوتي ليش العجل
ومازال ف عيونك كلام.. محبوس في صدر الخجل
ومازال مشروب العصير.. بارد ونصه ما كمل
ومازال في بيناتنا.. حكايات مش محكية
ومازال ف كتاب الغلا.. صفحات مش مقرية
وللهدرزة ع الحب.. عندي وعندك نية
ومازال ما هل الشتا.. ومازال حاسيّن بدفا
ومازال يدك في خفا.. ما لا مستش يديه
ومازال ف الخاطر كلام نقوله
ويمكن السهرة تطول.. وتاخذ الليل بطوله
وممكن تطول سنين
مازال بدري يا حليوة.. خلينا قاعدين
مازال اول لقاء بيناتنا.. ماطق حتى اسبوع
ومازال ما دخلناش ف الموضوع
ولا قدنّا حدانا شموع
ولا عيونّا من شوقها.. تمت تسح دموع
ومازال ما عرفناش.. كم هاتفك
وعنوان بيتك وين
مازال بدري يا عيوني
خلينا قاعدين
طرابلس:4/10/2003
