مواطن ليبي مربى خروف للعيد الأضحى ناض الصبح لقى الخروف ميت
رفعه لدكتور بيطري حتى يعرف سبب الوفاه
تفاجأ من قول الدكتور أن الخروف مات بالجلطة
ادار المواطن وجهه للخروف وشد قرونه وبداء يكلمه بتعجب وحرقه واستغراب
جاتك جلطة لوااااااااااه ؟
مهجر من حوشكم ومغلوب علي أمرك وضاقت بيك الدنيا ؟
مخطوف ولدك ومش قادر تدفع الفدية ؟
مراتك مطالبها هلبه .؟
مديون ومش عارف تسدد ديونك ؟
بتستنى تحجز في الجوازات ومعندكش نت ؟
حبيبتك تبي تتجوز ومش قادر تخطبها ؟
مش قادر تشتري ملابس لأولادك ؟
جاتك جلطة لواااااااااااه ؟
الضي ماعندكش وما قدرتش تشري مولد ؟
حاسس انك غريب عن ليبيا ؟
الدنيا ملخبطه أمن وامان مفيش ؟
سيولة مافيش في المصارف
والمرتب واقف وما انزل ؟
ارتفاع اﻻسعار مش عاجبك ؟
جاتك جلطة لواااااااااااه؟
جاك فشل كلوى ومشيت تغسل قالولك ما فيش مكان إنتظر كان مات حد وأدخل مكانه ؟
عندك السكر ومفيش انسولين ؟
عندك الضغط والدواء ببندقة علي العبد ؟
جاتك جلطة لواااااااااااه ؟
الدولار رقي ومش قادر تشريه ؟
خاطرك فى الحوت والكيلو متع السردينة ب 10 دينار والكوالي ب 15 دينار ؟
روحت تشترى لحم لقيت الكيلو 25 دينار ؟
جيت تشترى رز ولقيت الكيلو 4 دينار ؟
و400 غرام مكرونة ب 2 دينار
ولقيت فردة الخبزة بنصف دينار
حكية الحليب بثلاثة دينار ؟
وقعمزت قي المقهي المكياطة والت 2دينار
جاتك جلطة لواااااااااااه ؟
بنبلي الغاز لقيته 25 دينار ؟
بوطي لميه 80 دينار ؟
مركب خط نت والنت ما يجيش ؟
خاطرك فى الكرموس ومش قادر تشتريه ؟
المشماش نزل السوق وتم وانت ما سمعتش بيه ؟
تبي نشري دلاعه لقيتها تساوي 12 دينار وروحت بها لحوشك لقيتها بيضاء لا لون ولا بنه.
جاتك جلطة لواااااااااااه؟
متخرج من الجامعة ومش لاقي عمل ؟
العمر يجري ومادرتش شئ ؟
تبقوا عليك الخدمة الازمية ؟
رفعوك لدولة تشاد واوغندا بتحارب
تبقوا عليك البيت لساكنة او السيارة لمن يقودها
شاد طوابير كل يوم على الخبزة
مرضت ما لقيت من يعالجك او يعالجك بالخارج
بتشري بطارية السيارة لقيتها بتساوي 200دينار
والا عجلة سيارة لقيتها 250 دينار
ام زوجتك مدرهتلك كبدك ؟
خوتك وخواتك مقاطعينك ؟
عندكم ثلاث حكومات …وكل واحد يلهط ويعبي في شكارته ؟
جاتك جلطة لواااااااااااه ؟
تتفرج على تصريحات الاعلامين في التلفزيون مدرهينك كبدك ؟
تستمع الي تحليلات ناكر ؟
تقرا في بيانات المجلس الرئاسي ؟
وتفرج على القنوات الليبية المفتنة ؟\وتفرج على مطلل المفتن مش عاجبك والا محمود الورفلي وهو يصرخ والا الطياري وهو يخرط شني مش عاجبك هيا قول
واااك عليا واااااك ..
جاتك جلطة لواااااااااااه ؟
وشن نبي ندير في العيد الكبيرة بلاك وااااك عليا
ربي يكون في عون المواطن الليبي
طرابلس الغرب/ليبيا
الثلاثاء 09/08/2016م
