خلاص فطمته
صابر على افراقك اقدر رومته
بعد خونتك قلبي
رام القهر
رام الجفاء منك ارضي بالهجر
رام العذاب ورام طول السهر
نادم على حبك بعد لوعته
لكن الخاطر ما ايروم الغدر
بالله جاوبني عليش قهرته
عطيتك حناني فاض كيف النهر
وأنت هنتني وين فاض ما قدرته
بالود في جنانك غرست الزهر
وانت شوك غدرك في الصميم زرعته
عازيت واجد نين تم الصبر
الخونه صعيبه بها خاطري كسرته
اليوم نتركك واحسب احساب الدهر
المولى كفيل قلبي اللي روعته
نا مسامحك في ما مضى من عمر
وبينك وبين الله في اللي درته
والليم ما ينباع بعد العصر
وانت هنتني وبعته غلاي اخسرته
رام افراقك
فطمته على بعدك قفلته بابك
ماتهمني ولا عاد شي نشقاباك
الخاطر لويته عالجفاء قدرته
انسيتك سلوتك ديرها في حسابك
حبك جبدته مالصميم نزعته
طفين اشموعك والظلام ادرابك
قنديلك طفا زيته كمل نزحته
طبعك الغادر للخيانه جابك
ذاهب علي درب الوفاء ودرته
حربه اتلون في احروف كتابك
بابداع كذبك راسمه سطرته
ميت احساسي من لهيب عذابك
قلبي على نار الجفاء قمرته
لا شوق هزني لا هاسني في غيابك
ولا دمع من عيني عليك ذرفته
ولا حلم راود في منامي جابك
رسمك محيته مالخيال حذفته
امرار خونتك دردر غدير شرابك
كما طعم علقم في كنيني ذقته
رام البعد
ورام السهر من خونتك للعهد
خساره بعد كونك قطعت الوعد
بموس الخيانة ودنا قطعته
ضريتني قاصد الخونه قصد
دسيت في العسل سمك ازعاف اشربته
مكسور خاطري مقنود منك قند
امتزعت الكبده وسطها دقدقته
عاشم انريدك لي تبقى سند
القيتك عدو ساس الوفاء صدعته
كثرن معاذيرك تركتك عند
كذبك طغى عالعذر ما صدقته
رام دموعه
ورام البكاء وامرار بين ظلوعه
ورام ليل ما يكمل اسمور ولوعه
كاره اوسادي والفراش هجرته
مذهوب شيرتك وصرفتك طبوعه
فيك الخيانه طبع ما غيرته
حصن الخديعه واهنات دروعه
انهارت تراكينه دمار تركته
انسيك خاطري ما بقيت شي موضوعه
حبك حضرته نافرك صادرته
مات الغلاء انت السبب في صروعه
بسهوم الخيانه عن اصرار قتلته
رام اصيافي
ورام حيرتي وشوقي وطول اريافي
ورام عين ما ترقد تسيل حذافي
لذيذ نومها جافل هجر ما ذقته
لحيت صبع يدي بالسنون حسافي
علي حب ضايع بالجفاء ودرته
درتك احبال الساريه ومجدافي
ودرتك الفرحي مركبه وقاطرته
نحسابك شقيق روحي عزيز اولافي
ونحسابك دواء لجروح ظمادته
ونحسابك وفي وما اطيق خلافي
ونحسابك عيوني تشغلك دمعته
ونحسابك نقي قلبك ونبعك صافي
ونحسابك الروحي اسناحها وعزوته
عطيتك غلاي اكوام كيله وافي
عشقك ملاني بالوفاء كبرته
رويت غصن قلبك بالحنان الدافي
وانت غصن قلبي بالجفاء عطشته
مطعون منك بين عرض اكتافي
طعنت خفاء بيها الوتين بترته
القيت في العسل محطوط سم ازعافي
اشربته ونا غافل وما استطعمته
قاصد تبهدلني اتريد تلافي
جنين الغلاء دون جالته شيبته
تماديت في غدرك يسدك كافي
ظلمت المشاعر والوفاء صغرته
ارحل اتركني اليوم حبك طافي
قلبي فطمته عالجفاء عودته
طريق السلامة في الامان عوافي
مع الريح حبك في الهواء بعثرته
وخلاص فطمته
.بعد خونتك قلبي
البريقه صباح يوم الخميس الموافق
28/01/2022
