حميد الذيب
يقول الشاعر علي بو لامين:
صب المر كان المر طاب…مش امر من فقد الاحباب
شاركته في هذا البيت وقلت:
صب المر زيد
مش امر من طعن الوريد
خذاني غر من درته وديد
ونا للغدر ما درتش احساب
طعني غدر ونا مادد الييد
وصل في العمق موسه غار غاب
عقب نار في جوفي صهيد
سمور ودمع فص الكبد ذاب
امغير نموج كيف قيس الشريد
قوتي مر زادي مالعذاب
جار الجرح نضح بالصديد
وصل في الروح وسط القلب صاب
لا طباب نافع لا ضميد
غاب الطب وحتى الفكر غاب
صب المر صب
اللي مصهود من نار الحطب
مش امر من ظلم العرب
ظلم الغير وظلم اللي اقراب
صب المر خليني نكب
نكب الدمع ونكب الجراب
للي صار ما القيتش سبب
ولا للغدر نا القيت الجواب
هذا وقت ياتي بالعجب
صارن فيه احداث اغراب
الطير الحر لابد في الخرب
وفيه البوم راقي للسحاب
م الزقوم اللي ماله كسب
تما اليوم حايز عالاعجاب
وها الايام ما فيهن طرب
ديار الوطن طال بيهن اجداب
صب المر خله يكب كب
مش امر من شوخة اكلاب
خلى مر زين
ويعقد عقد كيف لبخة الطين
شق الجمر من تحت العوين
خلي النار تلهلب بالسراب
يحلى المر في ريق الحزين
اللي لمرار قوته والشراب
مش امر من فقد الجنين
وفقد الخي اللي تحت التراب
ولا هو مر من ظلم السنين
ولا هو مر من فقد الشباب
ولا هو امر من خونة اثنين
اقراب الدم وخونة اللي احباب
صب المر نا فيا خزين
هم الوطن اللي تما خراب
فيه اطنين تما هو اطنين
عدى ذيب ودالنبا ذياب
…
وصب المر كان المر طاب …
