من أعمال التشكيلية الليبية نجلاء الفيتوري.
محكية

فيك شي؟؟

من أعمال التشكيلية الليبية نجلاء الفيتوري.
من أعمال التشكيلية الليبية نجلاء الفيتوري.

فيك شئ مش في البشر ..
وانتي ما تدري عليه ..
نجهل أني نجهله .. 
ونعرفه ، ونحتار فيه ..
إن دخلتي يسبقك .. 
وإن خرجتي تتركيه ..
وإن تكلمتي تمنّع .. 
وإن سكتّي تفضحيه ..
أوف يا قصة عيونك .. 
لمّا سلّمتي عليه ..
ولمّا فضفضتي ، وحكيتي .. 
ولمّا وانتي تودعيه ..
*****
إنتي راودتي المعنى .. 
يخترعلك أيّ معنى .. 
خارج اللّفظ البليد ..
خارج الألوان حتى .. 
خارج الأزمان حتى .. 
والمسافات القريبه ، 
والمسافات البعيد ..
أنتي راودتي القصيده .. 
تحلم إنها تكون زيّك .. 
فوق أحلام القصيد ..
والقصيده أيش هيَّ .. 
صفحه ، وشويّة كلام .. 
يعني كينونه عتيقه .. 
أيش فيها من جديد ..
امَّا انتي ما شبيهك إلاّ أنتي .. 
وألاّ بُكره .. لمّا بكره يكون عيد ..
أنتي لمّا نقول : أنتي .. 
نشعر بصوتك سعيد ..
والفضاء حولي يغنِّي .. 
لحن أكثر من سعيد ..
إنتي أنتي حتى شَعْرك بس لأنه ..
محتمي بجيدك سعيد ..
حتى ظلّك بس لأنه .. 
يشبه لحسمك .. سعيد ..
حتى فستانك ، وشالك ، 
والخواتم ، والعقود ..
والهدايا اللّي انهدتلك ، 
والتحايا ، والورود ..
والبطاقات الجميله ، 
والرسايل ، 
حتى صُندق البرد ..
وقالوا : حتى السّور .. 
هللّي حاجبك عني .. سعيد ..
وقالوا : حراس القبيله ، 
والعواذل ، والحسود ..
أنتي حتى الُحب حبِّك ، 
ويتمنَّى لو يزيد ..
أووف يا قصة عيونك .. 
لَمّا سلّمتي عليه ..
ولَمّا فضفضتي ، وحكيتي .. 
ولَمّا وأنتي تودّعيه ..
فيك شيء .. مُش في البشر ..
وأنتي ما تدري عليه ..

مقالات ذات علاقة

حيرة

سالم العالم

إلى ليبيا التي نحب… مازال بدري ع الرحيل

سالم العالم

تغريبة / الطريق

الصيد الرقيعي

اترك تعليق