تراث

خرابين يا وطن

للشاعرة: فاطمة عثمان

هون في 15 نوفمبر 1928م

من أعمال التشكيلي عمران بشنة
من أعمال التشكيلي عمران بشنة

خرابين يا وطن ما فيك والي

وذيلك حوالي

والبعض في المشنقة والقتالي

*        *          *

خرابين يا وطن ما فيك هلْ

ركبك الذلْ

اللي ما جلى في المشانق احْصل

عدّّوا وْلا زول منهم وصل

وْباتوا مدالي

مثيل العراجين في راس عالي

*        *          *

خرابين يا وطن ما فيل دايل

امجد بالشغايل

وْناسه غدو من كلام السبايل

بْدمع لنْظار تذرف وسايل

على زول غالي

وعدهْ حاضر في ارقاق الحبالي

*        *          *

وعده حضر في امْقاط البحر

وفي يوم زر

ودولة العدوان هم الكفر

صبَّرتا خاطري ما صبر

زايد اهْبالي

أنا بعدهم يا عرب ما طرالي

*        *          *

خرابين يا وطن ما طاف ضيَّه

كْمل بالسّويه

وراحو مظاليم من غير سيه

ندهت يا رب يا هاشمية

جيب الغوالي

في يوم مبروك يخلص لسوالي

*        *          *

خرابين يا وطن ما فيك حدْ

وحزنك امْجد

ومن ما عقب فيك غير اللمد

هالمشنقة ما هفت من ولد

تحلف اهلالي

ولا خلَّفت زول من ما ايشالي

*        *          *

خرابين يا وطن ما فيك باقي

ايْجلّي انكادي

ويبيِّض القلب بعد السوادي

ندهتكم يا مشايخ ابلادي

اتجو عند بالي

في يوم حامي عليهم ايكالي

*        *          *

في يوم حامي عليم ايرر

عجاجه اكبر

وتفاح لسلام كيف المطر

ايباتن مطاويح روس الكفر

تحت النعالي

إهناك نزهى وْ يطمان بالي

*        *          *

خرابين يا وطن ما فيك عيله

عدوا جزيله

ولا زول بمواجعي نشتكيله

فيَّ جوف يا ناس مثل الفتيله

سامر الليل

ويارب عطنا عليك اتكالي.

مقالات ذات علاقة

يا وطن باعوك الانذال

ميلاد عمر المزوغي

طلة القمر وغيبته

المشرف العام

غناوي علم / الرّحيل

المشرف العام

اترك تعليق