قصة

اليـــد الســـوداء

من أعمال التشكيلي عادل الفورتية
من أعمال التشكيلي عادل الفورتية

أمام أحد المصارف تجمهر عدد من الناس في انتظار أن تفتح الأبواب لإنجاز مشاغلهم المختلفة.

صاح أحد المواطنين: الساعة توا 09:30 ومازال المصرف ما فتحش.. مفروض الساعة 09:00 يكون فاتح.

رد عليه احد الحاضرين: يا أخي هما حاجتين ما فيش غيرهم يا إما الكهرباء مقطوعة يا إما المنظومة مفصولة، وإحنا نسيبوا باقي أعمالنا و نقعدوا سريك مريك معاش لينا شغل إلا المصرف.

مواطن آخر: ذلونا بيهن ه القرشين في عقاب عمرنا.. اللهم نشكو اليك هذا الحال فبدل حالنا لأفضل حال

رد الجميع: آمين يارب العالمين.

أحد الحضور: يا جماعة مشكلة الكهرباء طولت وما فيش حد مسئول دارلنا حل في الموضوع هذا.

رد عليه أحد الحاضرين: إيه مزبوط يا دكتور معروف أني حضرت مقابلتك التلفزيونية إمبارك لما تكلمت في مشكلة الكهرباء، والله كلامك مزبوط مية مية.

د / معروف: يا جماعة ما يكذب عليكم حد في يد سوداء تبي الوضع علي هالشكل، الزمرة الفاسدة واللي ما تخافش ربي تبتز في الحكومة وتضغط عليها بإفتعال مشكلة في الكهرباء حتي تتحصل علي إعتمادات وعمولات وتوقع علي عقود إنشاء محطات جديدة بالمليارات.

ردد الجميع: لا حول ولا قوة إلا بالله.. ربي ياخذ فيهم الحق إن شاء الله

د / معروف: اليوم إن شاء الله فيه جزء ثاني للمقابلة التلفزيونية باش تحضروها في قناة….  و حنتكلم علي الحلول الممكنة في هالمشكلة ومن ضمنها الطاقة الشمسية.. يا جماعة بلادنا فيها عدد ساعات مشمسة طويلة وأكبر سطوع شمسي علي كوكب الأرض.. وهذا يخلي فرصتنا كبيرة جدا عن أي دولة أخري في توليد الطاقة الكهربائية من الشمس..

الحكومة إذا نيتها صادقة وصافية تتوجه  لتنفيذ هذا الحل اللي يلغي مشكلة الكهرباء بالكامل.

أحد الحضور: إيه مزبوط الله ينورك يا دكتور.

د / معروف: هل تعرفوا يا جماعة أن وحدة الطاقة الشمسية المنزلية تكلفتها 2000 يورو يعني يا مواطن يا كريم تقدر تركب هذه المنظومة في بيتك كاملة بسعر لا يتجاوز 4000 دينار ليبي.. وهني يجي دور الدولة والمصرف هذا اللي واقفين قدامه.. يفتح إعتمادات لشركات خاصة بالسعر الرسمي ويتم مراقبتها في التوريد والبيع.

وإلا..  يتم بيع النقد الأجنبي للمواطن بسعر الصرف العادي مقابل شراء منظومة طاقة شمسية منزلية من الخارج، كل هذا يتم وفق إجراءات إدارية ورقابية ومستندات حتي نضمن عدم التلاعب والتزوير والسرقة.

أحد الحضور: الله ينورك يا دكتور.. والله كلامك مية مية.. لكن الجماعة اللي قلت عليهم بكري ( الزمرة الفاسدة ) مش ح يخلوك لا أنت ولا غيرك ولا الحكومة تديروا أي حل.. راقديلكم في الخط علي طول.

سمع الجميع صوت السلسلة الحديدية وهي تسحب من قبل أحد موظفي المصرف إيذانا بفتح الباب وبداية يوم مصرفي جديد.

بصوت مرتفع وصارم: عفوا يا جماعة أعطوني الطريق خلي بنخش أني الأول.. راني مستعجل ونبي نتم موضوعي بسرعة.. راني مشغول جدا جدا من ساسي لراسي.

د / معروف: كلنا مشغولين زيك يا خوي.. وسع بالك

– لا معلش.. أني مشغول أكثر منكم..وجاي للمصرف نبي نحللكم مشاكلكم كلكم

د / معروف: عفوا من حضرتك لو سمحت

– محسوبك مفتاح مصباح الضاوي مدير المشتريات بالشركة العامة للكهرباء وجاي نبي نفتح إعتماد توريد قطع غيار وملحقاتها.

مقالات ذات علاقة

غشايش..

حسين بن قرين درمشاكي

قصتان في لون الريح

محمد دربي

ضياع

هدى القرقني

اترك تعليق