الصَّحرا ..

الصَّحرا

وأنا نحكي علي صحراي ..

مَهْد الخطاوي الأوِّلى .. والتجربة والطوف .

نحكي علي صحراي .. والحكي ما بِنْطوله ..

لِمْجلله زعتر ، وشِيح ، ومْضَللّة بكهوف .

نَفْس الفضاء .. نَفْس الهواء . نَفْس الظُّروف ..

نحكي علي صحراء ..

هي .. نَفْس شُوك الطَّلح .. نَفْس المطرْ المغَيْبَة ..

هي .. نَفْس ملح الملح .. نّفْس القمرْ القرَيْبَة .

نَفْس الرياحْ . نَفْس الشمس . والإندياحْ . نَفْس الكُسُوف ..

لكن أنا صحراي .. والحال فيها قاسي .. الحال كي ما تشوف .

علمتني .. شكلتني .. وعلمت روحي الحياة ..

وقالت :

الماء المَسْكُوب .. أوُوُفْ .. ما يْعُودشي مَغْرُوفْ .

وقالت :

كُسُوف الروح .. خُوف .. هُوْللي .. سْمَاه كُسُوفْ ..

الصَّحرا .. فَيْلَسُوفَ .

* * * *

الصَّحرا …

وأنا نسأل علي صحراي ..

هل هي .. أسْفَار مْسَافرَة .. أبْعَدْ من المَعروف ؟

في صَمْت .. يِتْحَشْرَجْ .. صَمْت .. في كُهوف .. صَمْت كُهوف ؟

ليش النبي .. عَدَّالها .. ليش الحكيم لجالها ..

وليش .. ليش سؤالها .. ما تَاسَعَاش حروف ؟

هل هي .. قَلَقْ .. ساور ألَقْ .. في أفْقْ عُمْقْ الجُوفْ ؟

هل هي عَطَش ؟ هل هي عُواء ؟ وخَوف .. يْتَنَاسَلْ خَوف ؟

تبدو العلاقة غامضة ..

بين الدموع ، والخُشوع .. بين الكُفًوف ، والدُفُوف ..

وتبدو .. النجوم الوامضة .. مَكْشُوف .. لأهْلِ الصُّوَفْ .

والباين الصَّحرا ..

صَحْ .. رُؤى .. فيما وراء الشُّوف ..

في .. ما .. وراء ..  الصَّحرا فَيْلَسُوفْ .