مدينة_درنة
شعر

يا صوتها

يا صوتها

يا دليل عمري اللي جنح في التيه

يا نجم روّد خطوتي وعيوني

شرّع رواشن غربتي للشمس

لون ليالي وحشتي وظنوني

لا كنت قبلك شيْ

ولا نكون بعد شيْ

طير الهواء يرميه

تلعب عليه الريح

تعليّه و توطيّه

أتغرْبه .. تكويه

تلسع جناين خاطره ، تبكيه

تنساه وتنسّيه

في حبس ماله ضي

– 2-

ياصوتها

يا عمر جاني من زمان بعيد

يا كحل رباني علي شطآنها

يا وعد من دنيا بلا تحديد

يا حن عطر أحضانها

ياليل طالت بيه سوالفها

وسوالفها على صدري نهار جديد

يا صوتها

يا عيد ميلادي .. وعيد الروح في روحي

وعيد العيد ..

وعيدك فيّ

مخلّي روحي تدوي ..دي

– 3 –

يا صوتها

يا زها الدنيا اللي تفتح وردها في عيوني

ياغيم بشبش في جدب عمري

رطب شفايف يا بسه

طيب ملامح عابسه

وما قال نبي شي

وين كنت .. بس ؟

قوللي وين كنت ؟

عمري تبدد في مراجاة العزيز علّيْ

– 4 –

يا صوتها

يطقطق على باب حبسي يحله

يهل في مهله

ينزل على جرحي دواء

ويلم عمري

هذي مشت في البوح

أوراق وأقلام وكلام

وهذي أرتمت في السوح

أسفار وهجر وأوهام

وهذي تحت صهد الموح

سجن وقهر وأحلام

أمّا هذيك .. الياس قاد جملها

من غير طلة ..

عدت حسايف في العلل والعله

ما تقول عمري عشت من سنيني

شيْ

– 5 –

يا صوتها ..

قول للي رمت في القلب مشهاب نارها

وأشعارها

وجرّت خطاوي خاطري لأوعارها

وأسرارها

راه الغلال مازال

ومازالت في مشوارها

قول للي خذت راسي على جمارها

وأثمارها

وفتحّت بابي على نوارها

وأنوارها

ماشي من وشمها في عروقي زال

ومازلت من سمارها

قول للي عذابها مش كيف العذاب

ولا غيابها كيف الغياب

راه الولد ما تاب

قلبه علي موّالها ولا غاب

ومازال فيّ

عمر و عليّ

ماشي يمنع خطوتي عن بابها

وأترابها .. ما دمت حيْ

وفيا حس يعذب فيْ

– 6 –

يا صوتها

كل اللي بقى من عشق وشوق عندي لك

وكل ما جرى من نار و غلا .. وأرياف ومهياه

راهو لك

وكل ما في خاطري من بوح وموح .. ودم جروح

وفرحة من شلال الروح ..

كله لك .. وكله شوي

لضحكة ضوت ليل سنيني

خلت كل الدنيا ضيْ

مقالات ذات علاقة

إيهام

خالد المغربي

درنــة

رحاب شنيب

خبزًا ولوزًا وتينًا

مهند سليمان

اترك تعليق