كرم الشبطي – فلسطين
وينك يا خي
.
مين بينده علي
.
مش انت خليل الوزير ابو جهاد
.
ايوا نعم وشو بتريد مني
.
مش انا المقصود يا عم
سمعت الشعب بينادي وبصرخ
وبقول ويين أيام النضال
وبحكوا عن تاريخ الابطال
في ذكراك مليون حكاية ورواية
حنيت انا بس لحجر فقدته من زمان
كنت فيه اسطورة ومثلك بندقية كمان
.
والله يا بني كانت عن جد ايام وذكريات
تاريخنا اطويل بصراعنا مع الاحتلال
وشو اخباركم اليوم طمني لوين وصلتوا
.
ليش بدك تزعلني وتسألني هيك سؤال
حال ببكي الحجر والشجر وما عاد له طعم غير مرار
ولا حد بيسأل عن أحد غير يوم الراتب للقبض والسداد
.
طيب شو حررتوا من الوطن خبرني وما في اصبر
.
اليوم كله مشغول بالكورونا
والقضية من سنوات اصبحت كورة
بلعب فيها الكل
وعلى عينك يا تاجر بسعر البندورة
في الداخل والخارج وكل من هب ودب
كيف ما بنقول في البلدي وانت بتعرف
لهجتنا الفلسطينية وحوارنا المتعري
جلسوا مليون مرة مع بعض وما اتفقوا
.
له له له والله هيك خبرية ما بتسر وبضيق قبري
.
بعين الله والحال هذا مو جديد علينا ولا على قضيتنا
.
طيب شو ناوين تعملوا وما بكفي هدر لدمنا
احنا ضحينا واستشهدنا كرمال حرية وطنا
مش لتحكموا بعض وتقسموا شعبنا غزة وضفة
بكفينا عدونا وشو عمل فينا وما اتعلمتوا
.
يا ريت يسمعوك وينفذوا وصيتك
وبيوم وليلة يفرحوا شعبنا وينتصروا
بمجرد انهم يعلنوا فلسطين مش لعبة
.
فلسطين عروس الشرق
وبحرها ما في مثله
.
ولا خيراتها بتنعد في كتابة
وشعبها طيب بس بده حريته
عيب تخلوه ينزل ويطلب قيمته
.
والله كنا نخلي العالم كله ينهز
مجرد ما يسمع الفلسطيني هيو وصل
ينعمل مليون حساب وخوف من رد اشبال الحرية
.
آخ عليك يا ابو جهاد
وعلى زمن الختيار والحكيم وكل الشرفاء
كنا نشوف الوحدة ونفتخر بمنظمة موحدة
.
اليوم مش عارفين لمين القرار
وصار كل حزب وحركة خاطره يسوق البوصلة
ما تقول غير موضة واجتاحت وعمموها بدل الكوفية
.
ما علينا من الحوار وبلغ السلام لكل الارواح
حبينا نطمن عليكم ونسألكم كيف الاخبار عندكم
غلبتنا اخبارنا واحزانا وقلبناها على روسكم
بنعتذر لكل شهيد ولكل اسير ولكل جريح وللجميع
لحين ما يعودوا لرشدهم ويعرفوا معنى قيمة فلسطين
وما في شي برعبنا غير انه نفضل متحاصرين وواقفين لبعضنا
لا تقول وباء ولا غراب البين كيف ما كنا نسمع من اجدادنا البسطاء
ما في اخطر من بعد الانسان عن وطنه ونسيانه حقه وتفريطه لعرضه
معلش وما خليتوا على العين قدا ولا خليتوا غفران لحدا واسمعوها
بشكل جديد ومقتضب وقصروا كل الخلافات ومش وقت تصريحات وخزعبلات
سواء من هون او من هناك وما بهمنا غير وحدة وقرار يجمعنا كلنا
باسم الوطن والعهد والقسم ما بنتنازل عن شبر من ارضك يا فلسطين
وبلا صفقة قرن وبلا صفعة بطن وبكفي حكم واشهروا سيف العقل بوحدة دم
