محكية

نقطة ضعف


قادر تعذبني.. وقادر تعفي

عارف غرامك هو نقطة ضعْفي

تخُش مداري

تغير قراراتي وخط مساري

قادر اْطفيني وتشعل ناري

يذوب قلب فوق صدر الليالي مَكفْي

قادر تحدد وجهتي واسفاري

تجرح وبكلمة حنونة تشفي

تحسب ليالي الشوق في انتظاري

وان قابلتني شوق الليالي تخْفي

ترصد عيونك خطوتي واخباري

تجاهل وهو كتفك محاذي كتفي

أنت.. طفل يعبث في كتاب اشعاري

يسيب دفتره واْيجي يخربش كفي

يضحك مع غيري يجيب سهاري

وين نبتعد يبكي ويمسك طرفي..

مرة تكون البلسم

جرحي وعذاباتي بكلمة تحسم

مرات غامض في غموض الكلسم

تْضيع ابجدياتي ويعجز حرفي

بيديك فوق صفحة أيامي توسم

دورب شايكة فيها نلاقي حتفي

نصدقك ساعة تجيني تقسم

نورد ونشرب من مناهل نزفي..

ضعفي كامن

في وين ما لحظة بقربك نامن

وين ما ايديك غفن في ايدي ونامن

نقول للزمان خلاص هاضا يكفي

بيا المساعر في الغلا يسّامن

يرتاح العنا مني وجغني يغفي

فجأة.. على غفلة بعد نطّامن

تسحب إيديك نار شوقي تطفي

لحظات من عمر الهوى ما دامن

عطاك الغلا سلطة تقض وترفي..

مقالات ذات علاقة

يا خوفنا

سالم العالم

محكيات

الصيد الرقيعي

أفـيون المـشاعر

أحمد جلنقة

اترك تعليق