محكية

مـتـأخـــرة

ضي القمر صياد

واشواقنا ميعاد

والليل همسة خايفه

جيتي على اطراف الخريف

متسربلة بالصمت

مشحون فيك الكبت

لكن عيونك باين عليها مرايفة

جيتي بعد ذاب المسا

وبيني وبينك ليل

والجرح ما حلا غفا

لازيت ف القنديل

والعمر عدا كيف مانك شايفة

متاخرة دهر وثمان جروح

وجسر المواعيد انكسر

وسفح المسافات انحدر

وشوق الحياة مذبوح

والغيم ما ف يده مطر

والروح مالها روح

وما عاد عندي للمواجع صبر

والورد متيبس عروقه صايفة

…         …         …

بودي نرمم ما تهدم فيا

وبودي نلملم ما تحطم فيك

لكن اوجاعي مكبلات ايديا

وانتي الخوف المر

خضب كفوف ايديك

كيف نْتفاهم كيف؟

كيف نْتواعد كيف؟

نا جرح وانتي شفرة

وحتى بعد ما نلتقى

ميعادنا يجي طفرة

ودروبنا متباعدة

وحتى الظروف مخالفة

الله والنبي

لا تحلمي بالورد

الشوك غرسي والورق

لاتحلمي بالفجر

الليل عمري والشفق

ومدي الخطاوي صبح

تعبر حدود اوهامي

وعيشي حياتك فرح

خارج مدار ايامي

ولا تلزميني بالشرح

ماتت حروف كلامي

ودرب النهاية منفتح قدامي

وضي القمر صياد

وجروحنا ميلاد

وف القلب دمعة نازفة

مقالات ذات علاقة

انت الحب

أحمد جلنقة

ابتـســــمي

سالم العالم

تعال هنا

سالم العالم

اترك تعليق