مسرح

مسرحية.. ربــمــا

مسرحية من فصل واحد

من أعمال الفنان محمد الشريف.


ويمكن لمن تشاء ويشاء الإضافة لها.

ثمة ضوء إنارة خفيف.. وصوت اتصال من موبايل … و …

– آلو آلو … ميسو ..تسمعي فيَّ

– آلو نسمع فيك يا ابلة حوا

– باهي فكيني من هالطبلة .. ههه

– ههه كنها حلوة ابلة ..

– غير اسمعيني يا ميسو .. الطرد اللي حكيتلك عليه بيوصل اليوم العشية

– أيّن طرد يا ابلة؟

– باهي تو نوريك … تي الكتب اللي بنهديهم لمكتبة (تاناروت).

صرخة بهجة على الطرف الآخر

– حلووو بِكل وانتي صمت بِكل

– بُكل بُكل هلبة هكي .. المهم قبل ما ننسى …رتبتوا أمور الأمسية .

– أكيد يا استاذة حوا …

– والله توه انقز عليك من الموبايل وننتشك ..

– حتى استاذة ههههه باهي حوا حويوة شن رايك

– هكي مليحة بِكل وأنتي هكي سمحة وتمام

– غير بنقولك

– قوللي كلي آذانٌ ساغيةٌ…

– اتمحقني على اللغة توة يامي …

– هههه تغيييرة جو ..

– نعرفك يا ودّي ..اسمعي عندي فكرة ونبيك تطرحيها على الصحبة في تاناروت

– تمام شن الفكرة

– فكرت مع الاجواء المبشرة في ملتقى غدامس..

– إيييه ننقنك صدقتي

– تعرفي والله امس بكيت الحمد لله شهر رمضان هذا بركة علينا كلنا.

– وعودة للموضوع … الفكرة.

– فكرت بعد الأمسية اللي عندكم في بنغازي .. هيَّ قبل العيد باسبوع .

– نسمع وكلي آذانٌ صاغيةٌ.

– اقتراحي إنه يكون عندنا نشاطات مشتركة في غدامس على هامش الاجتماعات من ليبيا كلها لو امكن، لكن مبدئيا بنغازي وطرابلس ….

– توضيح اكثر .

..

– انتي وهي طايرة تفهميها ….

– يعني (تاناروت) ومن طرابلس ( الجمعية الليبية للآداب والفنون)

– يعني أمسيات ثقافية ….شعرية ووو

– تمام .. اللي نقدروا عليه وانتم (ماعقبتوا شي) موسيقى مسرح رسم …

– باهي فكرة مش بطالة …

– اييه يعطيك الهني مش بطالة ولكن تبي استعداد وتنسيق وترتيب

– بشويش .. غير قوليلي راهو اجتماع كبيييير وامم متحدة

– طبعا لازم نرتبوا الامور وتكون عند موافقة وتنسيق مع جمعيات ومنظمات مجتمع مدني في غدامس .

– المهم توه اطرحي الفكرة

– واني حنطرحها ولما يتم الموافقة …اكيد حيكون فيه اضافات ومقترحات

– حلووو دعم الاجواء اللي في غدامس بنشاطات ثقافية …

– شفتي ميسو محلاها … تصوري شاعرات شعراء .مسرحيين وفنانين تشكيليين واطفال ليبيا رقص وغناء وعييييد كبيييير ….

– لكن العيد تبي ياحوا

– كل يجهز …مقروض وغريبة وفطيرة وسفنز.. روزاطة وعبمبر … وزيديها خبزة فرن وفاصوليا..

وكسكسي نمّلي يفوح بالزهر والقرنفل..

– باهي باهي

شن قصدك بنغازي بتقصر (يتم تسمية ما تتميز به بنغازي في مناسبة عيد الفطر)

– ي اسلام .. ريقي جري …باهي يا ستي كلها خيرات ليبيا

– أكيد كلها خيران ليبيا .

– أماله نراجي في رايكم ..وفيسع ياميسو … وانا متيقنة الجميع حيوافقوا …

وبعدين كل شي ساهل ويترتب

– اكيد والعيد عيدين

– الله عليك العيد عيدين

أحضان وشوية دموع ااااااه

أخيرا بنرتاحوا

– ونعمروا بلادنا واولادنا وبناتنا يتهنوا

– ايييه محلااااهم .. يعيشوا للعلم والحب والفرح …

وما تنسيش سلمليللي هلبة على الاحبة في تاناروت يا ميسون .

– باهي باهي بشويش عليك

– والله الا ما نعضك لما نجيكم بنغازي …

– ونا كلي لك ….

– ايييه هكي باهي وانت باااااهيييااااا

إظلام … صوت قذائف، صوت اهتزاز ابواب ونوافذ وصراخ.
وصوت رنة موبايل يرتفع

صوت 1؛ بلهحة أهل الشرق صوت فتاة:

– آلو آلو السلام عليكم ..

صوت 2؛ يعطي احساس بانه مستيقظ من النوم، صوت فتاة لهجة طرابلس:

– آلو ..السلام عليكم …

صمت

صوت 2 بلهفة: كيف حالكم …طمنيني عليكم …

صوت 1: باهي الحمد لله …ثم صوت ارتطام شيء قوي بالارض …

صوت2: يالطيف خير طمنيني .

صوت1: عادي الحمد لله .. من معاي …

صوت2: انا ميسون يابلة حوا

صوت1: ان شاء الله خير

توة كيف كنت نحلم بيك

الصوتان معاً: ان شاء الله خير

 /

يختلط الصوتان معاً:

والله استحاشت بنغازي وترابها الاحمر
مرايفين على طرابلس ارض الزهر والحنة
استحشتكم هلبه هلبه
والله مرايفين عليكم واااجد وواجد ..

يعلو صوت قطع موسيقى من بنغازي من طرابلس من كل المدن الليبية

وأصوات شعراء وشاعرات
واصوات ممثلين وممثلات
لوحات تشكيلية للزواوي وعوض عبيدة …
صور فوتوغراف من فتحي العريبي لشخصيات من الغرب الليبي
وصور فوتوغراف لمصورين من الغرب الليبي لشخصيات ومناظر من الشرق الليبي ..

يخفت الضجيج

ويرتفع صوت موسيقى بلد الطيوب
ثم صوت محمود كريم
بلدي وما بلدي سزى حقق الطيووووب …

أصوات متداخلة

ايام كانت طفلة الدنيا الطروب …..

لقطات متسارعة ..

حتى مقطع نوبة المالوف في الاغنية
ياليل ياللالي

ثم

ليبيا ليبيا ….

هدووووء وفجأة

أصوات قذائف رشاش رصاص
صراخ سباب
شتائم
لقطات من معارك الفيس…

صور

طارق مترى .. حتى غسان سلامة

سياسين ليبين من المملكة.. الجماهيرية.. دولة ليبيا

ثم

إظلام تام
تظهر بقعة ضوء
بها بنت وولد في سن المراهقة …
بالإمكان سماع صوت دقات قلبيهما وتنفسهما …

تتململ البنت
(البنت بصوت من الشرق الليبي بنغازي)

– كنّك تبهت فيّ.

 الولد
(صوت من غرب ليبيا طرابلس)
يتنهد… أني أني.. ثم مسرعا

انحبك .

البنت بدلال: شن قصدك …؟

الولد بلهفة: انحبك

البنت: مرايف عليّ

الولد: ونموت فيك

البنت بشهقة: بعيد السووو

الولد: انحبك هلبة هلبة هلبة

البنت: وحتى نا نحبك واجد

اضاءة تظهر بالأعلى حيث مكان يشبه سدة يظهر راس رجل شايب بطاقية تمثل الشرق الليبي وقربه سيدة على راسها تستمال بعقدة اهل طرابلس

صوت الرجل وبه بهجة: شفتي يا ولية

صوت المرأة: شفت وسمعت العبيتر ..

الولد والبنت يتجمدان رعبا عند سماع صوت الرجل ويبتعدان بمسافة عن بعضهما

يرتفع صوت الرجل: ما هو العبيتر هضا يا حنة درناه قبلهم

(يشعر البنت والولد بالأمان يقتربان من بعض مجددا)

ثم يعلو صوت الولد: ياعمتي راهو نبي نتزوجها …

المرأة: إعطيك طرشيقة.. غير اكبر واخدم عليها وبعدين افتح فمك وجيبك وقول بنتزوجها

صوت الرجل: ايييه عندك الحق.. راهي هضي مهرها غالي.. غالي واااااجد

إظلام صوت قذائف … تلتجئ البنت لحضن الولد

يحتضنها وهو يربت على رأسها ..قائلا: ما تخا فيش اني جنبك اني معاك اطمني .

الرجل والمرأة يتخافتا الضحك

الرجل: شفتي يا زهرة هالعيل ما يطلع منه

المرأة: كان بنتكم هوينة يا امراجع …

ترتفع صوت زغروطة طرابلسية وصوت غناوة علم تناسب الموقف

صوت العاب نارية
صوت نوبة مالوف: نعس الحبيب
صوت كشك
ترتفع أصوات ضحكات اطفال بنات واولاد و زغاريد ……

مقالات ذات علاقة

مسرحية تتويج ملك – 2

حسن أبوقباعة

نصوص درامية من التاريخ الليبي .. حمّـودَة الـزَّاهي

رضوان أبوشويشة

رجل بلا رأس

سعيد العريبي

اترك تعليق