محكية

محكية الرحيل

حميد الذيب

من أعمال التشكيلي مرعي التليسي

كابوس ولا حلم
ولا هواجس
ولا حقيقة وعلم
ولا انتخايل
ولا معالم ريبه
ولا بداية ألم
فيه المشاعر في فراغ غريبه
كان للجفاء وسط المنام مواير
وكان الحنين مصدوم تايه حاير
كان للحقيقة في المنام احضور

ارهاصة افراقك في منامي واضحه
في نظرة عيونك في ملامح كالحه
فيها ابكاء وفيها اسمور
والورد في اجنان الغلاء
صاف وذبل مقهور
وطير الوفاء مات انقتل مغدور

ما بين شك وحيره رحال نا وجروحي
وما بين نار وغيره حسيت روحي بروحي
مليان صدري بالكدر زاد الوجع نين فاض
ما القيت حيلة للجضر وعش الدفاء اصبح بقايا انقاض
حامن حماماتي عالعش ما شافنه
عليه عاودن حامن هلبن عليه فاتنه
والقيتني قابض الريح امتبع مسارات السراب
نمشي اشوي نعاود انطيح ماعاد حامل هالعذاب
بروحي رهين القهر
موعود فقد وكسر
والدمع والياس العنيد

رحال ريقي مر
نورس مهاجر فوق لجة ريح
ما بين كر وفر وضعف الجوانح
وطول المسافه يميح
وما بين صدك وبين الحنان او ودي
صرخات اهآتي
وما بين جزرك وما بين شوقي ومدي
ضاعت مسافاتي
الرحلة بعيده زادي نزف جروحي
كسرة جديده مكسور تاهت روحي
رفيقي خطاوي شارد ه ودموع في المواقي غارقه
وآآآه عالشفايف شارقه
كلي ألم
قوتي صديد

ريت في المنام اقداري
حقيت الوفاء مغدور
مات انقتل
وريت الحنين ايموت
والشوق من شوقه انتحر
حسيتك غريبه عني تورا حنانك ضاع
ضاع الأمل مش مني حبي رخيص انباع
خايب رجاي وضني في حيرتي ملتاع
وين الأمل؟
واللي شريته باع
تحت الوفاء
لابس الغدراقناع
ضي الفنار زيته كمل وطفي
وين المسار؟
ضاع في السراب تاه في الخديعه اغبي
خيب الواقع ضني
ذبحتي وتيني والوريد
ايش درتلك نا كني
وانا اللي عاشق وديد

ما عاد نظرة عينك هي النظره لولا
ولا عاد لمسة يدك فيها الرعشة مطوله
غابت النظره الدافيه وسكتت الضحكة الصافيه
زاحت الرؤيه عالحقيقه استارها
لا نار طفت نار
ولامن عرف موعد رحيله احتار
مصدوم ما اللي صار
واقع مرير
تحت الضمايد زاد الألم نين جار
زاد السطير
وزاد الوجع
عبى الوتين فاض في الوريد

جفت مناهل ودنا وعطشت خواطرنا
طفيت مكابر نارنا وبردت مشاعرنا
والحس مخنوق انكتم صامت احروف البوح
ولفراق في لاخر حتم اللي صار هز الروح
انتي ختقتي فرحي ونا في الغيوب طويته
وانتي وفايا بعتي ونا بالدموع شريته
وجفت الدمعه الساخنه
جرحت اجفوني
والجمر مالبرد انطفى
طفيت انوار اعيوني
والشوق غطاه الجليد

راحل بروحي
لا نجم باين في السماء
لا اسهيل لا نجوم الثرياء
ولا صوت همسة في الخفاء
الا الـآآآه والدمعه السخيه
وصدمة الخونه رد الكفاء
وين الونس ..؟ وانتي الونس
وين الرفق…؟ وانتي الرفيق
والليل ما يكمل طويل
رفيقي دموع مهاجرة ودنياء غروره فاجره
مخنوق مش لاقي نفس
ولا ضي قمره لا ونس ولا حد بوجاعي يحس
مكسور ومسافر وحيد

كانت الرؤية في المنام رؤيه حزينة قاسيه
قولوا اقدار قولوا اقسام
لكن ما هيش وهم ولا هي اضغاث احلام
فيها وقائع واضحه اللي صار ما يبي دليل
من غير كلمة جارحة مجبور نختار الرحيل
زرعتك رويتك بذرة امل في جوفي
اليوم يكتبك ياسي الطويل
دمعة قلم في حروفي
ونرحل بعيد

مركب غلانا جانحه ضاعت مراسينا
تاهت قهرها الموج مش لاقيه مينا
في عتمة ضباب الياس ما ريت في عينك سبيل
بيدك هدمتي الساس ساس الغلاء صارالرحيل
كفت افراقك راجحة
سالت الدمعه المالحة
عالخد تسكب جارحه
نار وصهيد

نحسابك علي مرايفه ونحساب نا معشوقك
ثاريت المشاعر زايفه مبيوع نا في سوقك
الباين القيتيه الصوب القديم افرحتي
سمعتك اتنادي فيه باسمه بحتي
في كل حرف اسمعته نبرة حنين وشوق
بنبرة حنان وبسمه سرك اليوم فضحتي

وضحت الرؤية
اللي قاللي الاحساس
لا ضن لا وسواس
أنه شريكي فيك
واني ضحية وهم خنتي خذلتيني
وانك خدعتي نفسك ما خدعتيني
واني شريت السم كاسه سقيتيني
انتي قتلتيني
مات الحلم زف الرحيل
وتم الكلام

مقالات ذات علاقة

محكيات

الصيد الرقيعي

محكيات

الصيد الرقيعي

الصَّحرا ..

محمد الدنقلي

اترك تعليق