محكية

ما نيش طايح توّا

من أعمال الفنان محمد الشريف.
من أعمال الفنان محمد الشريف.

 
هدّوا عليا هدّوا
وارموا عليا حمولكم يا أولافي
وكوّلوا من هاللحم بأكتافي
وحطوّني في وجه المدافع سد ..
وقولوا عليا ما تريدوا اتقوّلوا
يا جعاااني ما نرد ..
ياما علي راسي تكسر سيل
وياما علي صدري جبال أنهدّوا
ومهما العيار تقوّا
بالعند فيكم واقف
وما نيش طايح توّا
 
……
حطّوا عليّا همومكم بالجملة
ما فيش في الدنيا حمل
يصعب عليّا حمله
سواء كسر خاطر
سواء سقف قاطر
سواء طفل متخلف وماهو شاطر
سواء تهجروا ما تولوّا
سواء تسكّروا الدنيا ف وجهي
وما هناك باب تحلوّا
سواء تعجنوا في سمعتي وتبلوّا
سواء تزرعوا ارضي مرار
وتبخلوا ما تحلّوا
 
عندي عزم في خاطري نافعني
وعندي ملاك للشعر ما ودّعني
وجمهور لو قلت الشعر يسمعني
وعندي مشاعر دافية تشبّعني
وعندي ثلاث أصحاب
صاحب علي فعل الخطا يمنعني
وكتاب مهما نهجره
لا يخون لا يوجعني
والله كل ما قلت آه
ينزل عليا قوّة ..
ومهما العذاب يزيد
وزدّتوا عليّا ضغطكم
فوق الزمان وسوّه
مسامح انا في ظلمكم
عندي شهامة ومرجلة ومروة
وبالعند فيكم صامد
وما نيش طايح توّا
 

24/11/2009

مقالات ذات علاقة

نقطة ضعف

بدرية الأشهب

لساني عصي

محمد الدنقلي

الشوارع الحزينة

خالد الجربوعي

اترك تعليق