محكية

لـــوحـــــــــــــة


إهداء إلى نحاتة

خوذي الحصى ، وصفِّه حجرة . حجرة .

وخطي بعصا .. عالرمل : ذكرى .

هانا بدأ .. هب الهواء .. هانا ضحاه ، وفجره .

والشاهدين إنتي ، أنا ، ولفحة هجير الجفرة .

وما غصن ما هزه الريح .. هَيّ نرحلو لِبُكره .

خوذي الحصى ..

بمنطق هوى .. وشهوة خيال جموحة ..

طرِّيه لين يلين لك ، وبثي الحياة في روحه ..

الحجر ما يعني : الحجر ، والغامضة : مشروحة .

الحجر : فيّد العاشقين .. ينطق بروحه . بروحه .

ويمسى .. مجاريد ، وعلم .. تالي الليل .. صُدوحة .

ويصبح .. زغاريد ، وملم .. وفرشة غلا مطروحة .

خوذي الحصى  ..

وهزي عراجين الخيال .. هشِّي أرياش جْنوحه .

ضربة الرّيشة .. تبتكر .. ما من دروب مفتوحة .

وما من حياة غير الحياة .. برَّا مدار البُوحة .

وما من نجوم . ما من لهب مخفي وميض قدوحه .

وما من سماحة داخلك .. بلا عشق ماي مشبوحه .

وما من سماحة خارجك .. في هالفضاء .. مطووحة .

خوذي الحصى ..

يا إنتي .. ياهُوووه .. يا .. شعر قايل روحه .

ديما وانا خاطر علي .. كيف الأطفال نخاطبك ..

ونقول : يا .. سمُّوحة .

يابنت واحات النخيل .. يا ريح ماي مكبوحة .

يا نسوم هبهب طري .. يا عاتية ، وكلوحة .

يادفاء دافي علي .. في خيوط شمس صبوحة .

يا ساقية تجري بماء .. جامة ، ونزوحة .

وتدَّافقي فوق التراب ، وتجَّاففي ، ونضوحة .

ونشوف فيك غادي بعيد .. وسط السّراب لموحة ..

إنتي .. شويهية مساء .. في السَّانية ..

وصفرة قليَّة آثلي ، وجلجلان وفوحة ..

وفتات تنورة قدي .. غير كيف نوصف ريحه .

إنتي حنوطية رطبْ .. نَز بعسل .. غطَّا صفور بلوحه .

إنتي .. لاقبي .. وين ساق بي .. خلَّى الوطاء درجوحة .

إنتى .. عود مكنان ، ونبق ، وغريرة ربيع ، وشيحة ..

في شقوق صوّان الهروج .. في ظل عُرفة طليحة  ..

في وين ما يبات القطا .. تحت القمر ضحضوحة .

إنتي .. اللي أنا عاشقك .. من لولي . لا اليوم .. لا غدوة ..

مرة نقيِّل .. حابك .. ومرة نليِّل .. سابك ..

ونغفي وانا ولهان بك .. ونصبحك ممدوحة .

فيك سر ساهل ذكره .. ما بين بيني ، وبيني ..

ولما نجي بنقوله .. يصعب عليا شروحه ..

ونشعر بقربك مني .. نهم نبي نلامسك ..

ونشايخك ….. ونهامسك ..

هاهي حرارة يدّك .. هاهي نظارت خدّك ..

هاي بسمتك .. هاي نسمتك ..

هانى أنا فيك انتى .. انا انتى .. انا انتى

كيف من يكلم روحه ..

قصة غريبة قصتك .. قصة حمام ، ودوحة .

بيدك حفرتي في الحجر .. تما يقول بروحه :

كم مات من نحَّات .. وما عمر ماتت لوحة .

خوذي الحصى ..

مقالات ذات علاقة

خلينا نكونوا اصحاب

سالم العالم

عمي صالْحِين والصالِحين…(حكاية شعبية )

سعاد الورفلي

نقطة ضعف

بدرية الأشهب

اترك تعليق