تراث

كيف المعادن

حميد الذيب

Heap of Faces 2020 Adnan Meatek Ink On paper 32 x 42 cm ركام من ملامح سابقة 2020 عدنان بشير معيتيق


كيف المعادن
تفرق اجناس الناس
فيهم رخيص كيف الحديد والنحاس
وفيهم الغالي كيف الذهب والماس

فيهم الناس الزين
فيهم تقي وفيهم قليل الدين
وفيهم غضيب وفيهم رضي الولدين
تفرق معادنهم اجناس اجناس

فيهم اللي زينه حدود الزين
وفيهم اللي خبثه اكداس اكداس

وفيهم اللي ما فيه منه اثنين
وفيهم اللي طبعه ردي بصاص

وفيهم اللي دمه ثقيل رزين
لا ذوق عنده لا قدر لا احساس

وفيهم اللي خوان بو وجهين
حلال يندعس وبالقدم ينداس

فيهم اللي ينشال فوق العين
مخلص نقي طبعه الوفاء وناس

فيهم اللي زنده حديد ما يلين
فزاع في الشدائد وقتها تراس

وفيهم كما الحرباء مطبوع ع التلوين
هان الكرامة عالشرف دواس

فيهم اللي الشيطان له قرين
ما يخاف ربي في الخفاء خناس

وفيهه اللي يلعب على الحبلين
في الوجه يضحك وفي القفاء وسواس

وفيهم اللي معقب وراه خزين
خزينه ايشرف يرفع صحيح الراس

وفيهم اللي امعقب الصيت الشين
بين العرب عارفينه لحاس

فيهم خيره
وفيهم ردي ما يساوي احتات بصيره
وفيهم اللي كيف الذهب والليره
بهن يوتزن وبعيارهن ينقاس

وفيهم اللي فزاع عنده غيره
عالجمر يعفس ما هو اللي كراس

وفيهم اللي يشرف نظيف السيره
مفطوم عالعصر ماهو اللي دحناس

هذا اللي ودك رفيق اديره
علي صاحبه لو مات ما ينهاس

الناس خالقها الله كثيرة
منهم املاح وفيهم اوحود اخناس

الزين ما يصعب علىك تحكيره
اصحاب الدنايه عرقهم دساس

غربلهم افرزهم اختار الخيره
اولاد المسامي ديرهم مجلاس

هاذي اجناس الناس
في صدرك احفظها وديرها نبراس
كيف المعادن تفرق

مقالات ذات علاقة

غناوة.. لخصت موقفا تاريخيا..

ناجي الحربي

اشقى ابروحك

ميلاد عمر المزوغي

رقّن اعزوم النظر

المشرف العام

اترك تعليق