محكية

كلّ عام وأنتَ بْخيرْ

عن الشبكة
عن الشبكة

كلّ عام وأنتَ بْخيرْ .. وكلّ عام وأنتَ طَيِّبْ ..

بيها أهمست في حلم .. وهي تمسح علي راسي !؟

وإلاَّ زعم في علم .. وإلاَّ خدعني إحساسي ..!؟

فيه شيّ .. مرَّ عليّ .. سمعته مليون مرَّه..

وفيه حلم لايذ بيّ .. مانيش عارف سِرَّه ..!؟

### ###

واصحيت من حلمي البهي .. وهي إيدها علي قلبي..

محتار هي .. موش هي .. اللِّي تاهت علي دربي .!؟

وأنا ننظر كما المعتوه .. وهي من حيرتي تضحك ..

توشوشني : عليش مشدوه .. واسمعني نوضَّحلك ..؟

بدت تهمس وراء روحي .. وخلف مجاهل المعنى ..

وبين الآه وجروحي .. وبين لهفةْ صوابعنا ..

وأنا مستسلم لديها .. وفيها معلِّق عيوني..

نكلِّمها .. نعدِّيها .. نحدِّثها علي جنوني..

وإلاَّ نعود لأحلامي .. يا ريت نقدر نعود لها..

أو حتَّى نتوه بأوهامي .. تخاتلني .. ونختلها..

ونسمع شهقةْ إحساسي .. وهي تمسح علي راسي

وتهمس لي علي غفلة .. ونا نايم .. ونا صاحي..

كأني نشم عطر دفلى .. وهي تمسِّد علي جراحي

كلّ عام وأنتَ بْخيرْ .. وكلّ عام وأنتَ طَيِّبْ

### ###

شن خطَّر الموضوع ..؟ وهي ليش صحَّتني ..؟

وتَسَلَّل وتهمس لي .. وليش تمسح علي راسي ..!؟

وتكتبني .. وتقراني .. كأنَّ العمر كرَّاسي ..

وغول العمر فاجاني .. ونا نحسب على حواسي

اليوم عيدي وميلادي .. وذكرى جيتي الدنيا

ورحلة عمر كان قاسي .. وكان للأسف عمري ..

تفاجيني بلمستها .. ببسمتها .. بضحكتها ..

وكلمتها فراشة حُبّ .. تحوَّم طيف علي قلبي ..

تردِّدها علي قلبي .. علي سمعي ؟؟ علي حلمي:

كلّ عام وأنتَ بْخيرْ .. وكلّ عام وأنتَ طَيِّبْ..

### ###

شن هالكلام السحر .. وشن خطَّره الليلة ..

وعليش توقِّف العمر .. وتهمس له .. تغنِّيله ..

وهي تعزف علي نبضي .. حَسَبْت العمر بحواسي ..

هذا سمعي .. هذا بصري ..

وهذي لمستي .. وشمِّي ..

ونذوَّق معاني الفرح بلساني..

وآمالي وآلامي وأحلامي وأحزاني..

وعلي ضفَّة عمر ولَّى .. أنا نفتِّش على عمري ..

وعلي وجهي .. وعلي دربي .. وعنواني ..

وهي تهمس علي غفلة :

كلّ عام وأنتَ بْخيرْ .. وكلّ عام وأنتَ طَيِّبْ ..

مقالات ذات علاقة

مُــشْ

بدرية الأشهب

الـكلمة الـشرارة .. لحظات مهمة في الثقافة الليبية

رامز رمضان النويصري

مازال بدري

سالم العالم

اترك تعليق