محكية

فوق ما أتّْصوّر

من أعمال التشكيلي محمد العارف عبيه
من أعمال التشكيلي محمد العارف عبيه

 
فوق ما أتّْصوَّر.. والزمان أصوّر
يدوّر عليك خاطِري..
ومازال ياما يدوّر
ومازال عيني بشوقها تَرْجَاكْ
لا هَان قلبي لا قدر ينساك
يللّي معاك الرُّوح.. تَسْمَىَ فْالغلا
يللّي بلاك العين ما شافت زَهَـا
وين إنْتَهتْ بيك الخطاوي وين
مْسَهَّرْ العين.. والخاطر عليك يدوّر
:
فوق ما أتّصوَّر خاطري مَلْهُوفْ
لميعـاد يجمعنا بعـد تِغْريْبـَة
مِنْ يُومْ غُبتْ وهوْ وراك يْطوفْ
يُطْوي عَلِشَانكْ دروب صعيْبة
نا خاطري .. مَا مَلْ مِنْ تِرْحَاله .. أمغيْر رَايَفْ عليك
نا خاطري .. مايضوق راحِةْ باله .. أمغيْر بـين إيديك
يا غايب بعد هالعُمرْ
ما عاد عندي صَبَرْ
وين إنْتَهَتْ بيك الخطاوي وين
مْسَهَّرْ العين .. والخاطر عليك يدوّر
:
مازال شوقي كيف عهدك بِيْه
ومازلتْ حُبّي بالوفاء راعيه
وفي العين بانيْلـك مْنَازِلْ وِدْ
بعد غيبتك لا ما سكنْها حَدْ
وفوق ما أتّْصوَّر شوقي
وفوق ما أتّْصوَّر غيتك ف عروقي
ولو تغيب مهما تغيب
ما تهون يا معشوقي
أمغيْر رَايَفْ عليك الخاطر
ومن مدّة عليك يدوّر … فوق ما اتصور
_____________________________
من ديوان (ابتسمي)

مقالات ذات علاقة

إلى ليبيا التي نحب… مازال بدري ع الرحيل

سالم العالم

درويش تحت الريح

الصيد الرقيعي

همزة وصل

محمد الدنقلي

اترك تعليق