من أعمال التشكيلي صلاح غيث.
قصة

رومـــــــــاتـــيــــزم

من أعمال التشكيلي صلاح غيث.
من أعمال التشكيلي صلاح غيث. الصورة: عن الفيسبوك.

ما فيش فايدة يا دكتور عبد الشافي، توا لي سنة وما فيش أي تحسن ، كل شهر نجيك تغير لي الدواء ما نفع شي . . لاحبوب لا شروبوا لا إباري لا مرهم
مازالن عظامي يسطرن ، وحتي النوم فاقده قليل ما نتريح ونرقد .
هذا ما قاله صابر في موعده الشهري مع الدكتور عبد الشافي المدهون إخصائي العظام والروماتيزم خريج أكبر الجامعات البريطانية ذو الخبرة الطويلة في مجال تخصصه .
د .عبد الشافي : والله حسب ما نفهم ، وبناء علي التحاليل الطبية وصور الأشعة ، نأكد لك مرة تانية وثالثة أن عندك روماتيزم عظام مش أي حاجة تانية
والآدوية اللي تاخذ فيهم حسب ما وصفت لك ، همة كل ما نعرف وكل ما هو متاح وموجود وما توصل ليه العلم ، لعلاج هذا المرض مش هني بس ، لكن في العالم كله .
رد صابر بشئ من الحيرة : باهي كيف ما فيش أي تحسن يا دكتور ولا حتي عشرة في المية ، أني ما نشكش في إمكانياتك وقدرتك العلمية
و خبرتك الطويلة في هذا المجال لا سامح الله .
د .عبد الشافي : فعلا والله شي يحير ، إني تبعت كل شئ من البداية ما فيش حاجة غلط . . واصل الدكتور حديثة بعد همهمة قصيرة . .لكن خليني نقولك . . في حاجة .
صابر في لهفة : شني يا دكتور إن شاء الله خير . . قول بالله طمني
د .عبد الشافي : الأدوية . . ممكن تعطيني الدواء اللي معاك نشوفه
أخرج صابر كيسا يحوي عديد من علب الدواء ناولها للدكتور .
بعد فحص الأدوية وقراءة البيانات الموجودة عليها توجه بحديثه إلي صابر قائلا بثقة : أعتقد . . لا بل أكيد أن الأدوية هي المشكلة .
الأدوية اللي تاخذ فيهم همه السبب في عدم شعورك بأي تحسن .
أضاف مسترسلا . . خلي نوضحلك أكثر . . الأدوية اللي قدامي توا مصدرها الهند ، تركيا ، مصر، . . الخ ، البعض منها منتهي الصلاحية وبعضها محتاج أنه يوضع في الثلاجة عند درجة حرارة معينة .
صابر : وهذا شن يعني يادكتور . .
د .عبد الشافي : يعني الأدوية الموجودة بالصيدليات أغلبها غير صالحة للإستعمال أو فاقدة للصلاحية ، نتيجة سوء المناولة والنقل والتخزين
أيضا جودتها وفعاليتها أقل . . من أمتي حني نستخدموا في أدوية هندية وإلا تركية و إلا مصرية . . طول عمرنا نستوردوا في الأدوية من سويسرا وألمانيا و بلجيكا .
رد صابر في شئ من الإنفعال : باهي شن العمل ، شن نديروا يا دكتور .
د .عبد الشافي : أبعث جيب الأدوية من بره من تونس وإلا الأردن . . مافيش حل ثاني للأسف .
. . بعد ساعة من الزمن في منزل صابر :
في إنتظار وجبة الغذاء جلس صابر مخاطبا نفسه :
يا والله حالة اولاد الحرام ها البزناسة ما خلو شي . . لا حديد لا شمنت لا لوح لاسيارات لامواد غذائية لا خبزة لا دولار لا يورو . . شي . .مسح . . مسح مش من دون . . ما طالقين شئ حتي الدواء لعبو فيه . . حتي الدواء خشوا وطلعوا فيه . . لا يقولوا الناس مرضي . . لا يقولوا الناس تعبانة لا يقولوا شيابين عزايز صغار . . لا حول ولا قوة إلا بالله ، حسبنا الله ونعم الوكيل فيهم وفي كل من وصلنا لهالحالة التعبانة .
وضعت صبرية سفرة الغذاء بين يدي زوجها ولاحظت شروده وعدم إنتباهه .
صبرية : تفضل الغدي جاهز . . هيه صابر . . وينك ياراجل . . وين سارح .
رد صابر : سارح في حالة هالبلاد . . لوين ماشيين لوين بنوصلوا . . مش عارف .
ح نحكيلك شن صار عند الدكتور عبد الشافي المدهون . . وهذا اللي خلاني سارح ونخمم
بعد دقائق قليلة . .أنهي صابر حديثه معقبا . . وهذا اللي صار من طقطق لي السلام عليكم .
صبرية : لا حول ولا قوة إلا بالله . . عندك الحق . . والله عندك الحق . . شئ يخلي الواحد يخمم ويسرح . . وحتي يتخوخم ، ناس لا عندها دين لا أخلاق لا خوف من الله لا وطنية . . دينها الفلوس وبس ، فلوس كيف ما تجي تجي ، لا من يردعهم ولا من يوقفهم عند حدهم . . وين وزارة الصحة . . وين الرقابة علي الأدوية . . وين الجمارك . . وين الدولة . . وين
لم يرد صابر وشرع في تناول غذائه علي مهل في حين تراقبه صبرية وفي رأسها ألف قصة وقصة .
بعد دقائق خاطبته قائلة : بعون الله تعالي دواك عندي . . لاتخمم لا تفكر ولا تحتار . . أصبر علي أسبوع واحد بس ، دواك من بلادنا من ليبيا ، لاتونس ولا الأردن ولا سويسرا ولا الهند ولا تركيا. بس إنت وتيلي صايبة تستاهل .
نظر إليها صابر بشئ من الريبة والشك . . هز رأسه مبتسما ثم واصل غدائه علي مهل قائلا : إن شاء الله . . ربي يستر، خودي اللي في خاطرك .
بعد أسبوع . .
تفضل يا صابر . . هذا جغيم سخون فيه لحيمات وهذوم شوايات فايحات . . من إمبارح وإني منقعتهم في الزيت والتومة والليم والخل والزعتر والكليل . . بالشفي يا خوي ، بعد ما تاكلهم توا ندهنك بشوية ليم و زيت زيتون ساخن ونغطيك ببطانية . ترقد و تعرق ويطلع منك المرض كله . . مش بس الروماتزيم .
في صباح اليوم التالي نهض صابر من النوم وقد أصبح في أفضل حال . . زالت عنه كل الأوجاع والألام . . أحس بكثير من العافية علاوة علي نوم عميق في ليلة إفتقدها منذ زمن طويل . .
نادي زوجته فرحا مستبشرا . . صبرية . . يا صبرية . . وينك يا مرا . . راهو ليك عندي حديدة دهب هدية .
حضرت صبرية علي عجل ، يعلوا وجهها إبتسامة فرح كبيرة : يا والله نهار مبارك . . يا والله نهار سعيد . . الحمد لله . . الحمد لله مش قتلك دواك عندي يا صابر . .
صابر : إي والله . . دواء مش من دون . . دوا مية مية . . زيت بلادنا ما فيش زيه دوا
صبرية : لا ياصابر ما هوش زيت بلدنا . . سلم هذاك الجغيم السخون . . وهذاك اللحيمات والشوايات الباهيات القنينات . . عارف هادوكم اللحيمات و الشوايات الفايحات منين ياصابر
رد صابر في شئ من الحيرة والإستغراب : منين يا صبرية
.
.
.
.
.
.
.
.
صبرية : هادوكم . . لـــــفـــــاعي . . لــــــفـــــــاعي بلادنا يا صابر .

مقالات ذات علاقة

قصص متقاطعة

سالم الكبتي

الطوفان

المشرف العام

تكوين

نعيمة اقوية

اترك تعليق