من أعمال التشكيلي بشير حمودة.
محكية

ديوان الخراب

الإهداء للصديق رضوان بوشويشة

من أعمال التشكيلي بشير حمودة.
من أعمال التشكيلي بشير حمودة.

(1)
أنا محبط …
أنا ياصاحبي متعب
انا أول ضحايا المشهد المرعب
أنا المهزوم م الداخل 
وم الخارج.. وف الميدان
وف الملعب. ..
أنا أخر قصيدة حب
أنا الممنوع أن أغضب
أنا المخدوع بأوهامي
أنا المهموم بأحلامي …
أنا اللي ماشي جنب الحيط
بس برضو أنا المذنب
__________________
9/4/2003

(2)
أنا متعب .. وتاعبني تردي الحال 
وهالكتمة اللي ف انفاسي
أنا محبط
واحباطي .. نتاج الاسئلة .. اللي اتدور في راسي 
ومش لاقي لها تفسير 
لعند امتى ؟
وليش هكي ؟
ومن مسئول ؟
وكيف الحل ؟
ووين الضي ؟
ونحن وين م اللي يصير ؟
وهالطفل يللي ينتظر في بكرة 
ويحلم يكون كبير 
ويدرس ويتعلم 
ويجتهد في قرايته
بالك يكون طبيب او طيار او مدير 
شن موقعه في حربكم ؟
ووين حصته من نفطكم؟
وكيف نضمنوا مستقبله؟ 
وكيف نضمنوا حتى حياته؟ 
واحنا رهنّا الوطن للتدمير
غريبة حالتك يابلد 
وحال الناس هو الأغرب 
انا ياصاحبي متعب …
_____________
20/7/2018

(3)
أنا محبط ..أنا متعب
وعارف كلكم زيّي 
وفيكم خوف من بكرة
وخجلانين من انفسنا 
متّنا مليون الف مرة
ومازلنا كل يوم نموت
عيشوا كان قدرتوا تعيشوا ..!!
عيشة حي .. لكن مدفون ف تابوت
إلا نحن نستاهل مايجرى فينا
مادام اخترنا السكوت
يكذب هللي قال علينا
شعب موحد أصله واحد 
وإن كله خوت ف خوت
احنا بعناها بالباطل 
والباطل مكسوبه باطل
وأحنا حوت اخرته .. يأكل في حوت
ومتعذّب يخلّص في ثأره 
من واحد زيّه متعذّب
أنا ياصاحبي متعب

(4)
أنا محبط .. أنا متعب
كيفي كيف التعابنين .. المفلسين 
اللي اخر حل وصلهم ..
إنك بيش تنجى بحياتك
كُن واحد م السلبيين 
مش مهم يحكمنا من 
ولّا من يقتل في من 
ولّا منهو عنده فلوس 
ولّا من عايش مسكين 
الشعار الماشي توا 
تربح ..اخطى راسي وقص !!
ومطرح ماترسي ح ترسي 
وعند العالم .. نحن اسمانا الشعب المنسي
وبيني بينك نحن أصلاً شعب معصّي 
فينا من يقتل في جاره
لأجل حمارة
وفينا من يحرق في بلاده
لأجل الكرسي 
بس اغلبنا دايخ م اللي صاير حوله 
ومش فاهمين
وكُلِتنا مش عارف رأسه من كرعيه
ووين يساره ..من ليمين
واغرب حاجة
الناس اللي تمشي في الشارع 
أما مفنّص ولّاغاضب
ولّا خايف 
ولّا هارب 
ولّا دايخ ولّا زارط ولّا شارب 
صعب تلاقي واحد يضحك 
اغلبهم تلقاه حزين ..
والحزن اللي عششّ فينا 
صنع ايديهم .. افتح قوس وحط نقاطي واكتب اسم اللي يخطرلك
وياويلك يللي تعادينا
وهالحزن اللي عشش فينا
صنع ايدينا .. افتح قوس ووحط نقاطي وخوذلك ساتر .. ماتعرفش اللي ح يضرك
ولّا الضربة منين تجينا
تبي تعرف نحن من ؟
خوذ الاعجب !!
ممكن فجاءة وأنت واقف في محطة
بتعبي طشّة بنزينة 
ساعة .. خمسة .. سبع سوايع 
تصّهد فيك الشمس وترجى 
وتحسب في الوقت اللي ضايع
ولّا واقف في اشارة أو في مفرق 
يزرقّلك واحد متعفلق
شكله كويس .. لكن فجأة 
يسحبلك مسدس ويبدأ يخرط وممكن يطلق
فيك..ف غيرك ..
في الجمهور اللي متزوغب
بس الاجمل 
أنه يسحبلك بوخوصة ولّا طابق ولّا حبلة
ويبدأ يضرب 
ورغم أنه يشتم ويسب ..
تبدأ تبررّ له في افعاله 
وتلقاله اكثر من سبلة 
وياربي سامحني في قولي
هالشخص اللي رب يعلم شن ظروفه
ومن اللي عافس فوق ذيله ..
ولّا اللي قاعرله طبله
يوصل حتى في الجلالة .. ويبدأ يربرب 
وانت ومية واحد غيرك قاعد عادي
تتفرج ع المشهد عادي
وممكن مبسوط ومستغرب !!
وفي عقلك تخمم وتقول 
ماشاء الله عليها بلادي 
وإن هذا الشخص الأهوج 
ليبيي حر 
متربي ف عيلة ومؤدب
أنا ياصاحبي محبط
أنا ياصاحبي متعب …
______________
1/9/2018

(5)
أنا ياصاحبي 
خسران عشرة شي 
ف لعبة مانعرفش نلعبها
ولا عمري خطرلي ف يوم 
إني نخش ملعبها
ومش عارف .. كيف فيها نفوز
ولا عارف كيف بنحسبها 
اضرب خلص
اسرق دلس
حاول إنك تبقي همجي 
واصحى إنك تبقى مفلس 
حتى الغابة 
فيها غزلة 
وفيها فيلة
وفيها قرودة
وفيها اسد 
وفيها ذيابة
لكن ابدا ماتلقى فيها خنابة !!
والحر اللي ساكن فينا
ديمة يرفض 
أنه يبقى مش انسان 
ويرفض أنه يدمر غيره 
أو أنه يستبيع عمره 
ولّا يقعد واحد يخنب 
انا ياصاحبي متعب

(6)
أنا ياصاحبي متعب 
من التفكير والتخميم
وف إعتقادي إن نحن شعب عظيم 
فينا خير وفينا طيبة 
وتخطرّلي في أفكار تساعد
فيها أفكار تحل وتربط .. وممكن تنجح
وبرضو فيها أفكار عجيبة
لكن ما في يدي شي 
لاصوتي مسموع عياطه
ولا بكايا مسموع نحيبه ..!!
لذلك وقفت التفكير 
كيف يفكر واحد يائس 
وطنه حايس .. وضعه بائس 
مركب مليانة رياس 
لكن مافيهاشي رايس
والنوّة اكبر من المركب
أنا ياصاحبي متعب …
______________
30/10/2018

(7)
أنا محبط ..أنا متعب 
ومتشظي .. 
كما مراية .. كسرها حزن 
كما صحراء .. خذلها مزن 
كما عيل .. رباوة قزن 
وخطواتي عكس دربي 
وشرقي مخالف لغربي 
وشمالي يم .. خلفه هم .. مايلتم
وجنوبي في مهب الريح
كنهو ماح الوقت يميح
وكنهو راح الخير يريح
وكنهو طاح العزة اتطيح
وشاف يد ممتدة في ظلام سواد
تنهش في لحم ابني بمخالبها 
وتنتش في اوراق الطلح 
وتقّلع في عروق الشيح
وخوتي كل حد في واد 
ومافي حد 
داير قلبه ع لبلاد 
الهم ازداد
مللي همه تكبر بطنه 
ومللي بايع عرضه ووطنه 
وم اللقاقة والفساد
واللي يدمّر واللي يخرّب
أنا ياصاحبي متعب
______________
22/1/2019

__________________________
قصيدة كاملة في ديوان واحد تحت الانجاز..كتبت على فترات متباعدة .. تنشر منها المقاطع التالية لأول مرة

مقالات ذات علاقة

لا

سالم العالم

حطب الارض

سالم العالم

يا عارفين

الصيد الرقيعي

اترك تعليق