محكية

درويش تحت الريح

للوهمْ شفرهْ

وللصمتْ هامهْ وخطوهْ

وللشمسْ لعبهْ وخيطْ

قبل العيدْ

وللكاس صهوهْ

وللّون حلمْ وذكرى

ولليلْ والبحرْ

راياتْ ومواعيدْ

وأنت الغريبْ !!

وحيرتكْ

حيرة فضا مشنوقْ

بينْ الخيوط الخرسا

حيرة ندمْ مغصوبْ

حيرة مرايا سايلهْ

فوق الوجوهْ الملسا

في غربتك درويش!

وفي حيرتك درويش

درويش تحت الريحْ

من يعرفكْ ؟

من يكشفْ جواهرْ غايتكْ ؟

درويشْ تحت الريحْ

من يسمعكْ ..؟

من يخبرْ دروبْ حكايتكْ ..؟

غرّدت خارج سربكْ

وغيرك عبيدْ الصمتْ

صوتك شراره عايمهْ

ف ظلمة اوجاعْ العالمْ

وكاشفتْ الجميع بحبّكْ

وغيركْ عبيد الخوفْ

وعزمكْ حقيقةْ دايمهْ

في وجهْ الزمانْ الظالمْ

مقالات ذات علاقة

يا عارفين

الصيد الرقيعي

محكيات

الصيد الرقيعي

الوطن

محمد الدنقلي

اترك تعليق