تمهل يا خريف العمر
يا وقت الرحيل
غير ليش متعجل
ما زال فيّّا صابر
وما حاصر شموسي ليل
وعندي حلم متأجل
ومازلت ممتطي صهوة الكلمة
وخلفي الوقت مترجل
ومازال الزمان يردد في قصائد شعر قايلها
والتاريخ ثاني ركبته ع الشمس ويسجل
تمهل يا خريف العمر
غير ليش متعجل..
تمهل يا خريف الريح
وبطل لعبة التلميح
مازال فيا طفل
يـبي يعيش.. يـبي يصيح
ويبي يلون الدنيا على كيفه
ويبي يلوح بسيفه
ويبي يخربش كتابه
ويبي يحطم العابه
ويبي يعرف اصحابه
ويبي يذوق معنى الوجد والتبريح
ويبي يتوه ..يبي يريح
ويبي يشوف ويبي يطوف ويسافر
ويبي يقول للعالم
بإن كل من صنع الحياه… شاعر
وإن الموت عمره اقصر من الشعر
تمهل يا خريف العمر
طرابلس: 29 /4/2003
