تراث

حـد اللـوعـة

من أعمال التشكيلي عادل الفورتية
من أعمال التشكيلي عادل الفورتية


حد اللوعة
اللي وين ما نرقد يجي موضوعه
وياخذ معاي الليل
حد اللوعه ..
..
حد احمولك
على قولتك يا خوي يسلم قولك
لو كان يسمح هالوقت نحكولك
ع المايلة واللي بدت مردوعه
..
حد الحلم
يا وطنا والله شينك ظلم
لا حرب تنفع لا يجيبك سلم
اللي كنت شاريها بدت مبيوعه
..
حد الحد ..
وحد المواجع في الكنين بجد
ودون الغوالي جاي شينك سد
ما قدرت نرقاله صعيب اطلوعه
..
حد غلاه
ما قدرت نمشي لا نجي يالاه
تباعد وخلاني أنهز وراه
هو باعني وفيا كسب مطلوعه
..
حد الشوق
وحد العطش.. ويابسه لعروق
و وين ما عليا يا العزيز اتوق
انسلم وراياتي تجي مرفوعه
..
حد الصمت
اللي بيه صادق نحلف إني همت
قداش ليلة بالسعادة أحلمت
وين اكتمل حلمي فشل مشروعه
باعوه بيع وفيه ما سلمت
كيف ما اليوم بلادنا مبيوعه
مالقيت كيف اللي غلاه ردمت
لا ف طبع لا شكله ولا في نوعه
ولا لقيت في (زمزم) ولا (زازمت)
ولا في جلاوي (بي) لا ف نجوعه
اللي ضحكته تحلف تقول رسمت
مرتع السمحة الشاردة الهيزوعه
..
..
حد البوح
وحد الجروح الساكنة ف الروح
راحت وضاعت ف الاحلام صروح
وضاعت بعدها حقوقنا المشروعة..
..
حد السحر
يا فارس الكلمة و رب الشعر
خليك يا غالي علي هالشبر
سيد القول وكلمتك مسموعه
..
حد اللوعة
اللي وين ما نرقد يجي موضوعه
وياخذ معاي الليل
حد اللوعة

مقالات ذات علاقة

غناوة العلم

عبدالرحمن جماعة

هل هلالك

المشرف العام

ليّام يضربن ف الرّجاجيل

المشرف العام

اترك تعليق