محكية

ثلاثة رسائل من زمن غابر..

الرسالة الأولى:

مدخل..

سيدي السلطان..

لا سيدي ولا يحزنون

لكن.. (فرمان)..

حطة وصمة عالجبنون

لو فيه آمان..

جبنوني يصبح مدفون..

لو فيه آمان..

سيدي السلطان

أكبر.. جبان..!!

لكن..

وينك يا شمشون..؟!

*  *

ومدخل آخر..

كاني نتفكر.. ما جيتش ليك بمرسوم

يا دنيا عجيبة

ولا واحد علمني العوم

جيت بأحزاني

وأحزاني.. وأحزاني دوم..

هي المرسوم..!!

تفعيلة.

لما قطعني بنيابه.. ما تكلم حد..!

هاتولي ثمن الدبابة.. ما تخلي حد..!!

لا جايع غارق في عذابه.. لا حتى حد..!

لو كان الجد ينجيني.. نتكلم .. جد..!

ويا للي سألتوني عن حالي..

هاتو للي ثمن الدبابة..

نعطيكم رد..!

*  *

إستفهام.

لكن..

يا ماشي في خطي..

وما قدرت تقول!

(تفعيلة) وحدة في جملة.. في قلة قول

لا قدرت تلاحق

لا تسجل في حزنك (جول)

*  *

خاتمة.

وين المهبول..

وين الحقاني في الكون

وينك يا عاقل.. يا لابس ثوب المجنون؟!

*  *  *

الرسالة الثانية:

كتابة.

عين وآليف وشين.. وعاش اللي ما عاش

يا حرف لحسته من واحد.. طامع في معاش

بايديا كتبته في مداخل.. وحيوط حياش

من أجل يعيش اللي مطفي وديمة مهناش

لن..

مهناش..!

*  *

جملة.

مكتوب ف لوحك

يا لوحة راميها الموج..!

مكتوب ف لوحك.. تحيا في الدنيا ممزوج

غربة.. وأحزان وثوب على قياسك منسوج

واللي يتحكم في صغارك

أتفه فروج!!

*  *

صورة.

(شدولي الخانب).. والسلطان يخاف الله

والقصر معلي عالعاشر.. الله.. الله

(طامع في جاره.. ما يسده الحزن اللي معاه؟!)

(مرسوم: ف حزنه يتشنق..)!!

يا ربي.. لواه؟؟!

–         .. أمر السلطان..!!

*  *

مبايعة.

عاش السلطان..

(مولانا)..!!

أكبر دهقان..!؟!

*  *

خاتمة.

لشكون بتقعد يا عمري..

من يرضى بيك؟!!

إمشي لجهنم لعنة ربي ديمة عليك

إمشي وريحني..

راني كرهتك.. ما نبيك..!!

*  *  *

الرسالة الثالثة:

إلى المواطن صالح..

الذي دهسته احذية قوة الدفاع

عن الوطن.. رحمة الله.. عليه..

*  *

إندفاع.

(منين قالوا السعداوي جي)

(شرقت ورشوني بالمي)

لهدنا وياما لهد معانا عمي صالح

لين عيي!!

عيطنا لين عمي صالح أصبح في قراجيمه (دي)!

ورحمة ربي عليه توفى!!

ولا يملك (وجبة).. ولا (غدي)!

*  *

عزاء.

عمي صالح.. لانك صالح.. لانك من نسل الصلاح

زايد ناقص.. ناير كالح.. قاعد شاقي أو مرتاح!

ما دام السلطان ف باله

إنك عاله.. تحمي عياله.. وتستجداله..

وإنك مجرد فلاح..!

*  *

رجاء.

يا مولانا..

عمي صالح.. راهو مش فلاح كبير

راجل جاهل..

مش متعلم..

لكن.. ديمة فيه الخير

يفهم.. أحسن.. من وزير..!!

*  *

تسليم.

ما نعرفش علاش اخترتك

يا مولانا باش تكون..

راجل عاقل.. راجل يفهم.. راجل يشبح..

فيه عيون..

راجل عنده قلب وذمة..

مش قلبه ف بطنه مدفون

لكن..

يا مولاي أعذرني..

راني عاقل..

مش مجنون..!!

*  *

خاتمة.

عمي صالح مات..!!

لا عيد.. لا (سبات)..!!

مقالات ذات علاقة

في غفوة السردابْ

الصيد الرقيعي

اعترافات

سالم العالم

مسافات

الصيد الرقيعي

اترك تعليق