محكية

بنـــغازي

بنغازي عزوز موشمه ايديها

من كفها تطلع الشمس

في كفها  الثاني إطيح

مابينهن تعزل الشمس

أيـامنـا  وأحلامنـا

مابينهن تسكن  الريح

بنغازي عزور لابسة  ” رقعة “

بيها إحتمى ليل الشتا وصقعـة

 خيوط رقعتها أزقتنا وحوارينا

خيوط رقعتها

شراييـن الحيـاة فينـا

صوت  خطوتها ونـس

من غير ما نحكي تحس

من غير مانحتاج للتلميح

بنغازي عزوز لابسة ” جربي “

صوف جردها مغزول من قلبي

في جردها يخفي الزمان حكايته

ومن جردها يولد التاريخ

من جردها يفوح  البخور

غير عشقها محظـور

لوصفقت لحظة طرب

تنزع ثياب الليل وتفجر النور

لو صفقت  لحظـة غضـب

شمس الضحا ماادور

لو يوم قالت آه

من كثر التعب

كل القلـوب تصيـح

من كفها تطلع الشمس

في كفها الثاني  اطيح

مابينهن .. تغزل الشمس أيامنا وأحلامنا

ومابينهن تسجد الريح

مقالات ذات علاقة

أفـيون المـشاعر

أحمد جلنقة

شمعة بعد شمعة

أحمد جلنقة

لحـظـة

أحمد جلنقة

اترك تعليق