محكية

المرايا

من أعمال التشكيلية الليبية .. مريم العباني
من أعمال التشكيلية الليبية .. مريم العباني

 
كلنا نحتاج لمرايا
بيش نعرف نحنا مَنْ
وكم نختلف عنّا
وكم منقسمة الشخوص
بين إخفاء العيوب
وبين إظهار المزايا ….
ياريت نقدر ولو لحظة
نوقفوا من غير خوف
قدام أنفسنا عرايا ….
ونكشفوا النفس البريئة
كم فيها مِنْ دناءة
خافية خلف الوجوه
ومالية كل الخلايا ….
ياغباك … يا أنتَ الذي ..
كل مرة تخون فيها
تكون … أنت الذي ..
مضحوك عليه من البداية ….
كلنا نحتاج لمرايا
تكشف المسكوت عنه
تفضح المكبوت فينا
واللي خجلانين منه ..
من قساوة
ومن نفاق
ومن عهر
من ضعف يولد ضعف
من تخوف
من ذعر ..
من هشاشة
لابسة ثوب البشاشة
من رخاوة
لابسة قناع الحجر …
كلنا نحتاج لمرايا
كلنا نحتاج لتحدي
كلنا نحتاج لحقيقة
صادقة فيها النوايا
حتى نعرف نحنا مَنْ
مِنْ البداية للنهاية ….
 
طرابلس
26/2/2007
من ديوان ( علي جوك )

مقالات ذات علاقة

لا تلتفت

سالم العالم

أرقـص ..ألـم

سالم العالم

على كفّك

سالم العالم

اترك تعليق