إلى قصيدة (بصيص حلق) للشاعر خالد درويش
يا ساكنة ف الريح
والليل وقت هبوبك
يا نازلة ف صدر السما تجريح
وموشومة وجه القمر بهدوبك
لمتى البحر يغرق علي شاطيك
والشمس تصحى وتنطفى في ايديك
والصبح ف عيونك سفر
والفجر وان غروبك
يا ساكنة ف الريح
يا صابرة صبر البحر ع الملح
يا جارحة نصل الحقيقة جرح
يا مكحلة بالفجر عين الصبح
يا راحلة بين الشقا والفرح
لمتى المراكب في سفر
والشط غايب
ولمتى نتواعد ف المطر
جنب الحقايب
وما بين وعد وملقى
توقف حكاية صامتة
وخلف المرايا الشاردة
تطلع صورنا باهتة
يا شوقنا وانتِ بعيدة عنا
ويا شوقنا وانتِ قريبة منا
يا قاسية ف غيابك
يا باهرة ف حضورك
من خبى عليك عيوني
من علا علينا سورك
ومن قال اني ننكون لو ما تكوني
ومن قال ان نورنا ماهو قبس من نورك
يا ساكنة ف الريح
يا نايمة ف حضن الشتا
ومتوسدة لغيوم
يا ساهرة خلف المسا
ومخضبة كف السما بنجوم
كيف نكتبك
وبين الحروف مسافة ما تمتـلى بحروف
كيف نرسمك
واليد ديما راجفة
والوان حبري نازفة
ونبض الأنامل خوف
كيف نوصفك
والشعر مش لاقي شعر
والسر مش معروف
كيف نشرحك
وانتِ كما لغز الحياة
لا ينفهم لا ينسلى
وما فيش في علمي علم
يقدر يحل المسألة
(فبأي شوقٍ أتقيك وكلُ زادي أسئلة)*
يا ساكنة ف الريح
* مقطع من قصيدة بصيص حلق للشاعر خالد درويش
طرابلس: 4/10/2003
