قصة

أريفديتشي.. يا ليبيا

من أعمال التشكيلي.. معتوق البوراوي
من أعمال التشكيلي.. معتوق البوراوي

هيا وتي روحك يا صبرية ضمي دبشك وحوايجك وحطيهم علي تركينة.. ما نبي كان طولك وزولك ومعانا الأولاد.

– خير ان شاء الله

– عطيت عربون لواحد من جماعة الهجرة وبكرة في الليل طالعين علي بركة الله متسقدين لإيطاليا.

صمتت صبرية لبرهة وانعقد لسانها من هول الصدمة.. ثم قالت:

– لاحول ولا قوة إلا بالله.. خيرك يا راجل شن صار لك هبلت وإلا خف عقلك، توا في عقاب هالعمر نهجوا ونسيبوا بلادنا أهلنا وناسنا

– خلاص يا صبرية.. ضاقت علينا عيشتنا وقلت قيمتنا وبلادنا معاش سايعتنا.. اليوم الصبح وإحنا واقفين لا بينا لا علينا في طابور المصرف خشت بعضها ومصارش منه الطابور.. وهات جهدك وما يجيب.. دفوني ودفدروني ورفسوني برجليهم.. ولما نضت نعارك فيهم حصلت كفين باهيات من شباب في عمر صغاري.. بالله يا صبرية عاجبك هالحال وقلة القيمة.

طأطأت صبرية رأسها وشعرت بالأسف والحزن لما أصاب زوجها من ذلة ومهانة.

– لاحول ولا قوة إلا بالله.. شن الواحد بيقول.. والله ما هو ليك قلة القيمة والبهدلة في هالعمر يا صابر.. ربي يفرج علينا ويلطف بحالنا.. لكن مهما صاير وإلا بيصير هذي بلادنا ومش حنسيبوها.. صيورها يجي يوم وتتعدل.. صيورها يجي يوم وربي يفرجها.. تعود من الشيطان يا راجل وبدل ه الساعة بساعة تانية.. غير انت ما زال منفعل ودمك فاير.. راقيلك السكر وإلا الضغط.. تريح وخوذ شوية نفس حنجيبلك طويسة شاهي خضراء تهديك.

بعد بضع دقائق أحضرت صبرية صينية الشاي.. قدمت لزوجها كوبا من الشاي وهي تردد:

– تفضل بالشفي نشاء الله..

– أني خلاص قررت ومش ح نتراجع علي قراري.. كان بتجي معاي أهلا وسهلا.. وكان بتقعدي في هالتمرميد أقعدي إنتي حرة.

نظرت صبرية إلي زوجها وقد فاضت عينيها بالدموع:

– يعني خلاص ما فيش فايدة فيك ياصبر

خلاص ياصبرية.. خلاص (أريفديتشي.. يا ليبيا)

مقالات ذات علاقة

مفردات من حيرة الدقائق

محمد العنيزي

كيلوباميا

محمد النعاس

عرافة

المشرف العام

اترك تعليق